National Film Awards 2026 હવે પ્રવાસન સ્થળોએ યોજાશે, અશ્વિની વૈષ્ણવે તમામ રાજ્યોને કરી ખાસ અપીલ

National Film Awards 2026: ગુજરાતના એકતા નગરમાં આજે 72મા નેશનલ ફિલ્મ એવોર્ડ સમારોહનું આયોજન કરવામાં આવ્યું છે. આ સમારોહમાં રાષ્ટ્રપતિ દ્રૌપદી મુર્મુ વર્ષ 2024માં ભારતીય સિનેમામાં ઉત્કૃષ્ટ કામગીરી કરનારા કલાકારો, ફિલ્મમેકર્સ અને ટેકનિશિયનોને સન્માનિત કરશે. આ વર્ષે પ્રથમ વખત નેશનલ ફિલ્મ એવોર્ડ સમારોહ નવી દિલ્હીની બહાર એકતા નગરમાં યોજાઈ રહ્યો છે.

એવોર્ડ સમારોહને પ્રવાસન સાથે જોડવાની પહેલ

કેન્દ્રીય રેલવે મંત્રી અશ્વિની વૈષ્ણવે જણાવ્યું કે નેશનલ ફિલ્મ એવોર્ડ સમારોહને હવે દેશના વિવિધ મહત્વના પ્રવાસન સ્થળો સુધી લઈ જવાનો પ્રયાસ કરવામાં આવી રહ્યો છે. તેમના જણાવ્યા અનુસાર, અત્યાર સુધી આ પ્રકારના રાષ્ટ્રીય કાર્યક્રમો મુખ્યત્વે કોન્ફરન્સ રૂમ અથવા હોલ જેવા સ્થળોએ યોજાતા હતા, પરંતુ હવે તેને દેશના મહત્વના પ્રવાસન સ્થળો સાથે જોડવામાં આવી રહ્યા છે.

વૈષ્ણવે જણાવ્યું કે પ્રવાસન સ્થળો પર નેશનલ ફિલ્મ એવોર્ડ યોજવાથી એક તરફ ભારતીય સિનેમાની ઉજવણીને નવું ફોર્મેટ મળશે, તો બીજી તરફ સંબંધિત સ્થળના પ્રવાસનને પણ પ્રોત્સાહન મળી શકે છે.

એકતા નગરથી શરૂ થઈ નવી પરંપરા

આ પહેલની શરૂઆત માટે એકતા નગર, કેવડિયાની પસંદગી કરવામાં આવી છે. અહીં સ્ટેચ્યુ ઓફ યુનિટી સહિત અનેક પ્રવાસન આકર્ષણો આવેલા છે. PIB મુજબ, 72મો નેશનલ ફિલ્મ એવોર્ડ સમારોહ 22 સપ્ટેમ્બર 2026ના રોજ એકતા નગરમાં યોજાઈ રહ્યો છે અને ભવિષ્યમાં પણ આ સમારોહ દેશના વિવિધ રાજ્યો અને શહેરોમાં યોજવાનો નિર્ણય લેવામાં આવ્યો છે.

તમામ રાજ્યોને નોમિનેશન આપવા અપીલ

અશ્વિની વૈષ્ણવે દેશના તમામ રાજ્યોને આગામી નેશનલ ફિલ્મ એવોર્ડ સમારોહ માટે પોતાના મહત્વના પ્રવાસન સ્થળોનું નોમિનેશન આપવા અપીલ કરી છે. તેમણે રાજ્યોને પોતાના પસંદ કરાયેલા પ્રવાસન સ્થળે કયા પ્રકારના સુધારા કરવામાં આવશે તેની માહિતી પણ રજૂ કરવા જણાવ્યું છે.

તેમના જણાવ્યા મુજબ, જે પ્રવાસન સ્થળની પસંદગી કરવામાં આવશે ત્યાં આગામી નેશનલ ફિલ્મ એવોર્ડનું આયોજન થઈ શકે છે. આ પ્રક્રિયા દ્વારા ફિલ્મ ઉદ્યોગ અને દેશના વિવિધ પ્રવાસન સ્થળો વચ્ચે વધુ જોડાણ ઊભું કરવાનો પ્રયાસ કરવામાં આવી રહ્યો છે.

ફિલ્મ ઈન્ડસ્ટ્રીના દિગ્ગજોની હાજરી

નેશનલ ફિલ્મ એવોર્ડ દેશના પ્રતિષ્ઠિત ફિલ્મ સન્માનોમાં સામેલ છે. તેમાં ફિલ્મ નિર્માતાઓ, કલાકારો, સિનેમેટોગ્રાફર્સ, ટેકનિશિયનો અને અન્ય ફિલ્મકર્મીઓ જોડાય છે. 1954માં શરૂ થયેલા આ એવોર્ડ્સમાં ફીચર ફિલ્મ, નોન-ફીચર ફિલ્મ અને સિનેમા પર લેખન સહિત વિવિધ ક્ષેત્રોમાં પ્રતિભાને સન્માનિત કરવામાં આવે છે.

આ પણ વાંચો : Rajya Sabha Election 2026: તારીખો જાહેર, UPની 10 અને ઉત્તરાખંડની 1 બેઠક પર 16 ઓક્ટોબરે મતદાન