Army Education Support: સૈનિકોના બાળકો માટે સારા સમાચાર! ભારતીય સેનાએ કર્યો મહત્વનો કરાર

Army Education Support: દેશની સરહદોની રક્ષા કરતા સૈનિકોના બાળકોના શિક્ષણને લઈને ભારતીય સેનાએ મહત્વપૂર્ણ પહેલ કરી છે. સેનાએ દેહરાદૂનના કમ્બાઇન્ડ (PG) ઇન્સ્ટિટ્યૂટ ઓફ મેડિકલ સાયન્સ એન્ડ UIHMT ગ્રુપ ઓફ કોલેજિસ સાથે સમજૂતી કરાર (MoU) કર્યો છે. આ પહેલ હેઠળ સેવામાં રહેલા અને નિવૃત્ત સૈનિકોના પાત્ર બાળકોને ઉચ્ચ શિક્ષણમાં આર્થિક રાહત આપવામાં આવશે.

શહીદ જવાનોના બાળકોને વિશેષ સહાય

આ કરારની સૌથી મહત્વપૂર્ણ બાબત એ છે કે દેશની રક્ષા કરતી વખતે **શહીદ થયેલા સૈનિકોના બાળકો અને પરિવારજનોને વધારાની સહાય આપવાની જોગવાઈ કરવામાં આવી છે. સૈનિક સરહદ પર દેશની સુરક્ષા માટે ફરજ બજાવે છે ત્યારે તેના પરિવાર અને ખાસ કરીને બાળકોનું શિક્ષણ પણ મહત્વપૂર્ણ ચિંતા હોય છે. આ પહેલ તેમના પરિવારને આર્થિક રાહત આપવાની સાથે બાળકો માટે વધુ સારી શૈક્ષણિક તકો ઊભી કરવામાં મદદ કરશે.

ટ્યુશન ફીમાં મળશે ખાસ છૂટ

સમજૂતી કરાર હેઠળ સંસ્થા ભારતીય સેનાના સેવામાં રહેલા અને નિવૃત્ત સૈનિકોના પાત્ર બાળકોને ટ્યુશન ફીમાં વિશેષ ડિસ્કાઉન્ટ આપશે. એટલે કે સૈનિકોના બાળકોને ઉચ્ચ શિક્ષણ મેળવવામાં ફીનો બોજો થોડો ઓછો થશે.

સૈનિક પરિવારના કલ્યાણ માટે સેનાની પહેલ

ભારતીય સેનાએ જણાવ્યું છે કે આ પહેલ તેના સૈનિકો અને તેમના નજીકના પરિવારજનોના કલ્યાણ પ્રત્યેની સતત પ્રતિબદ્ધતા દર્શાવે છે. દેશની સુરક્ષા માટે સૈનિકો પોતાનું કર્તવ્ય નિભાવે છે ત્યારે તેમના બાળકોના શિક્ષણ અને ભવિષ્યને મજબૂત બનાવવામાં સંસ્થા અને સેના સાથે ઊભા રહેવાનો આ પ્રયાસ છે.

રોજગાર અને તાલીમ ક્ષેત્રે પણ કામ

ભારતીય સેના સૈનિકોના પરિવારો માટે શિક્ષણ ઉપરાંત રોજગાર અને કૌશલ્ય વિકાસ પર પણ કામ કરી રહી છે. તાજેતરમાં એર ઇન્ડિયા અને ભારતીય સેના વચ્ચે થયેલા કરાર હેઠળ સૈનિક પરિવારો માટે રોજગારની તકો ઊભી કરવામાં આવી હતી.

58 ઉમેદવારોની રોજગાર માટે પસંદગી

આ પહેલ હેઠળ દેશભરમાંથી 58 ઉમેદવારોની રોજગાર માટે પસંદગી કરવામાં આવી હતી. તેમાં ભારતીય સેના સાથે જોડાયેલી વીર નારીઓ અને તેમના આશ્રિતોને પણ તક આપવામાં આવી હતી. આમાંથી બે મહિલાઓને આંતરરાષ્ટ્રીય સ્તરે નોકરી મળી હોવાનું જણાવાયું છે.

એરપોર્ટ અને એવિએશન ક્ષેત્રે તાલીમ

પસંદ થયેલા ઉમેદવારોને વિમાન ઉડ્ડયન અને એરપોર્ટ સેવાઓ સાથે જોડાયેલા વિવિધ કાર્યો માટે તાલીમ આપવામાં આવી રહી છે. પ્રથમ તબક્કામાં 16 ઉમેદવારોએ તાલીમ પૂર્ણ કરી છે અને તેમને રોજગારમાં સામેલ કરવામાં આવ્યા છે. તેમાં વીર નારીઓ અને તેમના બાળકોનો પણ સમાવેશ થાય છે.

આ પહેલથી સૈનિકોના બાળકોને ઉચ્ચ શિક્ષણમાં આર્થિક સહાય મળવાની સાથે તેમના ભવિષ્ય માટે રોજગાર અને કૌશલ્ય વિકાસના નવા રસ્તા પણ ખુલવાની આશા છે.

આ પણ વાંચો : INS Sudarshini: ભારતીય વિરાસતની ઝલક, બાર્સેલોના પહોંચ્યું INS સુદર્શિની; ‘લોકાયન 2026’ હેઠળ દુનિયાને આપી રહ્યું શાંતિ અને મિત્રતાનો સંદેશ