SIR અંગે ચૂંટણી પંચનું મોટું સ્પષ્ટીકરણ, તમામ નિર્ણયો સર્વસંમતિથી લેવાયા હોવાનો દાવો

Election Commission SIR Unanimous Decision: મુખ્ય ચૂંટણી કમિશનર (CEC) જ્ઞાનેશ કુમાર અને બંને ચૂંટણી કમિશનરો વચ્ચે SIRને લઈને મતભેદ હોવાના અહેવાલો વચ્ચે ચૂંટણી પંચે મહત્વનું સ્પષ્ટીકરણ આપ્યું છે. શનિવારે મળેલી પૂર્ણ ચૂંટણી પંચની બેઠક બાદ જારી કરાયેલા નિવેદનમાં ECIએ કહ્યું કે SIR સંબંધિત નિર્ણયો પંચની સર્વસંમતિથી લેવામાં આવ્યા હતા.

24 જૂન 2025ના આદેશથી SIRની શરૂઆત

ચૂંટણી પંચના જણાવ્યા અનુસાર, મતદાર યાદીની Special Intensive Revision (SIR) અંગેનો પ્રથમ આદેશ 24 જૂન 2025ના રોજ જારી કરવામાં આવ્યો હતો અને તેની શરૂઆત બિહારથી થઈ હતી. ત્યારબાદ પશ્ચિમ બંગાળ સહિત અન્ય રાજ્યો અને કેન્દ્રશાસિત પ્રદેશોમાં પણ SIR સંબંધિત પ્રક્રિયા હાથ ધરવામાં આવી હતી. ECIએ જણાવ્યું કે 27 મે 2026ના પોતાના આદેશમાં સુપ્રીમ કોર્ટે 24 જૂન 2025ના SIR આદેશને યથાવત રાખ્યો હતો.

12 અને 19 રાજ્યો માટે પણ સર્વસંમતિથી શેડ્યૂલ

ચૂંટણી પંચે જણાવ્યું કે 12 રાજ્યો અને કેન્દ્રશાસિત પ્રદેશો માટે SIRનું શેડ્યૂલ 27 ઓક્ટોબર 2025ના રોજ જાહેર કરવામાં આવ્યું હતું. ત્યારબાદ 19 રાજ્યો અને કેન્દ્રશાસિત પ્રદેશો માટે 14 મે 2026ના રોજ શેડ્યૂલ જાહેર કરવામાં આવ્યું હતું. ECIના જણાવ્યા મુજબ આ બંને નિર્ણયો પણ સર્વસંમતિથી લેવામાં આવ્યા હતા.

ECINETની સમીક્ષા માટે કમિટી રચાશે

ચૂંટણી પંચે ECINET સિસ્ટમની સમીક્ષા માટે સિનિયર ડેપ્યુટી ઇલેક્શન કમિશનરની અધ્યક્ષતામાં કમિટી રચવાની માહિતી આપી છે. આ કમિટીમાં IIT/IIITના એક સ્વતંત્ર નિષ્ણાતનો પણ સમાવેશ કરવામાં આવશે. કમિટી સિસ્ટમ કાયદા અને નિયમોની જોગવાઈઓ અનુસાર કામ કરે છે કે નહીં તેની સમીક્ષા કરીને ચૂંટણી પંચને રિપોર્ટ આપશે. રાજ્યના મુખ્ય ચૂંટણી અધિકારીઓ પાસેથી મળેલા ઇનપુટના આધારે પોર્ટલમાં અગાઉથી અનેક અપગ્રેડ કરવામાં આવ્યા હોવાનું પણ ECIએ જણાવ્યું છે.

SIR નોટિસ મળેલા મતદારો માટે પ્રક્રિયામાં ફેરફાર

ચૂંટણી પંચે SIR દરમિયાન નોટિસ મેળવનારા એવા મતદારો માટે પણ પ્રક્રિયા સરળ બનાવવાની જાહેરાત કરી છે, જેમના રેકોર્ડમાં અગાઉની યાદી સાથે મેપિંગ ન થયું હોય અથવા અન્ય લોજિકલ વિસંગતતા હોય. આવા કેસમાં BLO મતદારના ઘરે જઈને જરૂરી દસ્તાવેજો એકત્ર કરી શકશે. વ્યક્તિગત સુનાવણી સામાન્ય પ્રક્રિયા નહીં હોય અને અસાધારણ કેસમાં ઓનલાઈન સુનાવણીની વ્યવસ્થા કરવામાં આવશે.

રવિશંકર પ્રસાદે રાહુલ ગાંધીના આરોપો પર સવાલ ઉઠાવ્યા

ચૂંટણી પંચના નિવેદન બાદ ભાજપ સાંસદ રવિશંકર પ્રસાદે કોંગ્રેસ નેતા રાહુલ ગાંધીના SIR અંગેના આરોપો પર સવાલ ઉઠાવ્યા. તેમણે કહ્યું કે એક અખબારી અહેવાલના આધારે આરોપો કરવામાં આવ્યા હતા અને ચૂંટણી પંચે પોતાના નિવેદનમાં સ્પષ્ટ કર્યું છે કે SIR સંબંધિત નિર્ણયો સર્વસંમતિથી લેવાયા હતા. રવિશંકર પ્રસાદે કોંગ્રેસ અને અન્ય વિપક્ષી પક્ષોના SIR વિરોધનો પણ ઉલ્લેખ કર્યો અને સુપ્રીમ કોર્ટમાં થયેલી કાર્યવાહીનો હવાલો આપ્યો. તેમના નિવેદનમાં રાહુલ ગાંધી પર ખોટા આરોપો લગાવવાનો આક્ષેપ કરવામાં આવ્યો હતો. આ તેમનો રાજકીય દાવો છે.