BRICS Summit 2026: PM મોદી આજે પુતિન અને ઈરાનના રાષ્ટ્રપતિ સાથે કરશે મહત્વની મુલાકાત, આ મુદ્દાઓ પર થઈ શકે ચર્ચા

BRICS Summit 2026: 18મા BRICS શિખર સંમેલન દરમિયાન વડાપ્રધાન નરેન્દ્ર મોદી આજે રશિયાના રાષ્ટ્રપતિ વ્લાદિમીર પુતિન અને ઈરાનના રાષ્ટ્રપતિ મસૂદ પેઝેશ્કિયાન સાથે મહત્વપૂર્ણ દ્વિપક્ષીય બેઠકો કરશે. બંને નેતાઓ BRICS સમિટમાં ભાગ લેવા માટે દિલ્હી પહોંચી ચૂક્યા છે. વડાપ્રધાન મોદી સૌપ્રથમ રાષ્ટ્રપતિ પુતિન સાથે મુલાકાત કરશે. બંને નેતાઓ વચ્ચે દ્વિપક્ષીય સંબંધો ઉપરાંત રશિયા-યુક્રેન સંઘર્ષ, પશ્ચિમ એશિયાની સ્થિતિ, વેપાર, રોકાણ અને ઊર્જા સહયોગ સહિતના મહત્વના મુદ્દાઓ પર ચર્ચા થવાની શક્યતા છે.

https://twitter.com/ANI/status/2098356723287490584

મોદી-પુતિન મુલાકાતમાં કયા મુદ્દાઓ પર ચર્ચા?

મોદી અને પુતિન વચ્ચે સંરક્ષણ, ઊર્જા, ટેકનોલોજી, ફાર્માસ્યુટિકલ્સ અને બંને દેશોના લોકો વચ્ચેના સંપર્ક સહિત વિવિધ ક્ષેત્રોમાં સહયોગ વધારવા અંગે વાતચીત થઈ શકે છે. રશિયા તરફથી ભારતને બાકી રહેલી S-400 સિસ્ટમની સપ્લાય તેમજ Su-57 ફાઈટર જેટની સંભવિત સપ્લાય અંગે પણ ચર્ચા ચાલી રહી છે. બ્રહ્મોસ મિસાઈલને વધુ આધુનિક બનાવવાની સંભાવના અંગે પણ બંને દેશો વિચાર કરી રહ્યા હોવાનું અગાઉ રશિયન અધિકારીઓએ જણાવ્યું હતું. મોદી અને પુતિનની આ મુલાકાત એવા સમયે થઈ રહી છે જ્યારે બંને નેતાઓ તાજેતરમાં બિશ્કેકમાં યોજાયેલા SCO શિખર સંમેલન દરમિયાન પણ મળ્યા હતા. તે સમયે PM મોદીએ યુક્રેન સંઘર્ષનો અંત લાવવાની જરૂરિયાત પર ભાર મૂક્યો હતો.

https://twitter.com/mansukhmandviya/status/2098350294799446259

ઈરાનના રાષ્ટ્રપતિ પેઝેશ્કિયાન સાથે પણ મુલાકાત

પુતિન સાથેની બેઠક બાદ વડાપ્રધાન મોદી ઈરાનના રાષ્ટ્રપતિ મસૂદ પેઝેશ્કિયાન સાથે મુલાકાત કરશે. રાષ્ટ્રપતિ બન્યા બાદ પેઝેશ્કિયાનની આ પ્રથમ ભારત મુલાકાત છે. મોદી અને પેઝેશ્કિયાન વચ્ચે ભારત-ઈરાનના દ્વિપક્ષીય વેપાર, આર્થિક સહયોગ અને બંને દેશો વચ્ચેના સંબંધોને વધુ મજબૂત બનાવવા અંગે ચર્ચા થઈ શકે છે. પશ્ચિમ એશિયામાં વધી રહેલા તણાવ વચ્ચે આ બેઠકનું મહત્વ પણ વધી ગયું છે. ઈરાનના રાષ્ટ્રપતિએ ભારત રવાના થતાં પહેલાં BRICS દેશોએ પોતાની આર્થિક શક્તિ વધારવા પર ધ્યાન કેન્દ્રિત કરવાની જરૂરિયાત વ્યક્ત કરી હતી. તેમણે BRICS બેંકની ભૂમિકા અંગે પણ વાત કરી હતી અને ડોલર પરની નિર્ભરતા ઘટાડવાની દિશામાં સહયોગની જરૂરિયાત દર્શાવી હતી.

https://twitter.com/MIB_India/status/2098348742680441339

BRICS સમિટ દરમિયાન વ્યસ્ત રહેશે PM મોદી

BRICS સમિટ દરમિયાન PM મોદી અનેક મહત્વપૂર્ણ નેતાઓ સાથે મુલાકાત કરશે. આ ઉપરાંત તેઓ સંયુક્ત રાષ્ટ્રના મહાસચિવ એન્ટોનિયો ગુટેરેસ સાથે પણ મુલાકાત કરવાના છે. પુતિન અને પેઝેશ્કિયાન સાથેની બેઠકને ભારતની વિદેશ નીતિ અને વ્યૂહાત્મક સંબંધોની દૃષ્ટિએ મહત્વપૂર્ણ માનવામાં આવી રહી છે.