Surat ની પી.પી. સવાણી હોસ્ટેલમાં ફૂડ પોઈઝનિંગનો કેસ, મનપાએ ફટકાર્યો ₹1 લાખનો દંડ

Surat મહાનગરપાલિકા દ્વારા હોસ્ટેલને ₹1 લાખનો દંડ ફટકારવામાં આવ્યો છે. પી.પી. સવાણી હોસ્ટેલમાં પનીરનું શાક ખાધા બાદ આશરે 100 જેટલા વિદ્યાર્થીઓને ફૂડ પોઈઝનિંગની અસર થઈ હતી. વિદ્યાર્થીઓને તબિયત લથડતાં સારવાર માટે લઈ જવામાં આવ્યા હતા. ઘટનાને પગલે હોસ્ટેલની ખાણીપીણી વ્યવસ્થાને લઈને પણ સવાલો ઊભા થયા હતા. આ ઘટનાની જાણ આરોગ્ય વિભાગને બીજા દિવસે કરવામાં આવી હતી.

આરોગ્ય વિભાગની ટીમ હોસ્ટેલ પર તપાસ માટે પહોંચે તે પહેલાં જ હોસ્ટેલમાં રહેલા ફૂડનો નાશ કરી દેવામાં આવ્યો હોવાનું સામે આવ્યું હતું. જેના કારણે અધિકારીઓને ખોરાકના સેમ્પલ લઈને તેની તપાસ કરવાની પ્રક્રિયામાં મુશ્કેલી ઊભી થઈ હતી.

ફૂડનો નાશ અને મેડિકલ સર્ટિફિકેટનો અભાવ

આ ઉપરાંત હોસ્ટેલના રસોડામાં કામ કરતા કર્મચારીઓના મેડિકલ સર્ટિફિકેટ પણ અધિકારીઓને મળ્યા ન હોવાનું સામે આવ્યું હતું. ફૂડ તૈયાર કરતા કર્મચારીઓના આરોગ્ય સંબંધિત દસ્તાવેજો ઉપલબ્ધ ન હોવાની બાબતને પણ તપાસ દરમિયાન ધ્યાનમાં લેવામાં આવી હતી.

આરોગ્ય વિભાગ દ્વારા સમગ્ર ઘટનાની તપાસ હાથ ધરવામાં આવી હતી. ઘટનાની જાણ મોડી કરવા અને તપાસ દરમિયાન સામે આવેલી અન્ય બાબતોને ધ્યાનમાં રાખીને મહાનગરપાલિકા દ્વારા પી.પી. સવાણી હોસ્ટેલને ₹1 લાખનો દંડ કરવામાં આવ્યો હતો. ફૂડ પોઈઝનિંગની ઘટના બાદ હોસ્ટેલમાં વિદ્યાર્થીઓની સલામતી અને ભોજનની ગુણવત્તાને લઈને પણ ચર્ચા શરૂ થઈ હતી. મોટી સંખ્યામાં વિદ્યાર્થીઓને અસર થતાં ઘટનાને ગંભીરતાથી લેવામાં આવી હતી.

પનીરનું શાક ખાધા બાદ વિદ્યાર્થીઓની તબિયત લથડી હતી

બીજી તરફ આ મામલે વિદ્યાર્થી પરિષદ પણ મેદાનમાં ઉતરી હતી. વિદ્યાર્થી પરિષદ દ્વારા વિદ્યાર્થીઓના પ્રશ્નો અને હોસ્ટેલમાં ભોજનની વ્યવસ્થાને લઈને રજૂઆત કરવામાં આવી હતી. વિદ્યાર્થીઓના હિત અને તેમની સલામતીને લઈને યોગ્ય પગલાં ભરવાની માંગ કરવામાં આવી હતી. સમગ્ર ઘટનામાં આરોગ્ય વિભાગ દ્વારા હોસ્ટેલની ફૂડ હેન્ડલિંગ પ્રક્રિયા, રસોડાની વ્યવસ્થા અને કર્મચારીઓ સંબંધિત દસ્તાવેજોની તપાસ કરવામાં આવી હતી.

હવે ફૂડ પોઈઝનિંગની ઘટનાનું ચોક્કસ કારણ શું હતું અને ભોજનમાં કોઈ ખામી હતી કે કેમ તે અંગે સંબંધિત વિભાગની તપાસ મહત્વપૂર્ણ બની છે. 100 જેટલા વિદ્યાર્થીઓને અસર કરનારી આ ઘટનાને પગલે મનપાએ કાર્યવાહી કરીને ₹1 લાખનો દંડ ફટકાર્યો છે, જ્યારે વિદ્યાર્થી પરિષદે પણ વિદ્યાર્થીઓના પ્રશ્નોને લઈને રજૂઆત કરી છે.

આ પણ વાંચો : Surat માં 151 ગણેશ પંડાલોમાં અનોખું અભિયાન, દુર્ઘટના મુકત-નશા મુક્તનો સંદેશ લોકો સુધી પહોંચાડાયો