Jamnagar News: રિલાયન્સ દ્વારા 6,000થી વધુ કન્યાઓને નવરાત્રી નિમિત્તે લહાણી અર્પણ કરી ભારતીય સંસ્કૃતિ અને પરંપરાનું સન્માન

Jamnagar News: ભારતીય સંસ્કૃતિમાં નવરાત્રી એ શક્તિની આરાધના, આસ્થા, શ્રદ્ધા અને પરંપરાનું પર્વ છે. આ પવિત્ર પર્વ દરમિયાન ગરબાના માધ્યમથી મા જગદંબાની આરાધના કરતી દીકરીઓ આપણી સમૃદ્ધ સાંસ્કૃતિક ધરોહરની સાચી સંવાહક છે. આ પરંપરાને સન્માનિત કરવા અને નવી પેઢીમાં ભારતીય સંસ્કૃતિ પ્રત્યે ગૌરવની ભાવના વધુ મજબૂત બને તેવા ઉમદા આશય સાથે રિલાયન્સ ઈન્ડસ્ટ્રીઝ લિમિટેડના ગ્રુપ પ્રેસિડેન્ટ ધનરાજ નથવાણીના માર્ગદર્શન હેઠળ રિલાયન્સ રિફાઈનરીની આસપાસના 35 ગામોના 95 જેટલા ગરબી મંડળીમાં ગરબે ઘૂમતી કન્યાઓને નવરાત્રી નિમિત્તે 6,000થી વધુ લહાણી અર્પણ કરવામાં આવી હતી.

છેલ્લા 30 વર્ષથી લહાણી અર્પણ કરાય છે

નવરાત્રીમાં ગરબા થકી દીકરીઓ માત્ર ધાર્મિક આસ્થા જ વ્યક્ત કરતી નથી, પરંતુ પેઢી દર પેઢી ચાલી આવતી ભારતીય સંસ્કૃતિ, લોકપરંપરા અને સામૂહિક એકતાના મૂલ્યોને પણ જીવંત રાખે છે. આ દીકરીઓની ભક્તિ, શ્રદ્ધા અને સાંસ્કૃતિક જોડાણને બિરદાવવાના ભાવ સાથે રિલાયન્સ પરિવાર દ્વારા છેલ્લા 30 વર્ષથી અવિરતપણે લહાણી અર્પણ કરીને પરંપરા અકબંધ રાખવાના પ્રયાસને પ્રોત્સાહન પૂરું પાડવામાં આવે છે.

સામાજિક-સાંસ્કૃતિક મૂલ્યોના સંવર્ધનની પ્રતિબદ્ધતાનું પ્રતિબિંબ

ભારતીય પરંપરામાં લહાણી માત્ર ભેટ કે ભેટસોગાદ નથી, પરંતુ સ્નેહ, આશીર્વાદ, સન્માન અને લાગણીની અભિવ્યક્તિ છે. ખાસ કરીને નવરાત્રીના પાવન અવસરે કન્યાઓને લહાણી અર્પણ કરવી એ શક્તિ સ્વરૂપા દીકરીઓ પ્રત્યેના આદર અને સ્નેહનું પ્રતીક છે. આ પહેલ દ્વારા દીકરીઓમાં પોતાની સંસ્કૃતિ અને પરંપરા પ્રત્યે ગૌરવની ભાવના વિકસે તેમજ આવનારી પેઢીઓ સુધી આ અમૂલ્ય વારસો જળવાઈ રહે તેવો સંદેશ આપવામાં આવ્યો હતો. રિલાયન્સ દ્વારા કરવામાં આવતી આ પહેલ માત્ર એક ઉત્સવની ઉજવણી પૂરતી મર્યાદિત નથી, પરંતુ ગ્રામ્ય સમાજ સાથેના આત્મીય સંબંધો મજબૂત કરવાની અને સામાજિક-સાંસ્કૃતિક મૂલ્યોના સંવર્ધનની પ્રતિબદ્ધતાનું પ્રતિબિંબ છે.

દીકરીઓની આસ્થા, પરંપરા અને સાંસ્કૃતિક વારસાને સન્માન આપતી આ સેવાભાવી અને સંસ્કૃતિપ્રેમી પહેલને ગામના આગેવાનોએ હૃદયપૂર્વક આવકારી હતી. તેમણે આ ઉમદા કાર્ય બદલ ધનરાજ નથવાણીને વિશેષ અભિનંદન પાઠવી રિલાયન્સ પરિવાર પ્રત્યે આભારની લાગણી વ્યક્ત કરી હતી. ગામની બહેનો અને દીકરીઓમાં પણ આ પહેલને લઈને અપાર આનંદ અને ઉત્સાહ જોવા મળ્યો હતો. બહેનોએ રિલાયન્સ અને ધનરાજ નથવાણીનો હૃદયપૂર્વકના આશીર્વાદ આપતાં તેમના સુખ, સમૃદ્ધિ, સ્વાસ્થ્ય અને ઉત્તરોત્તર પ્રગતિ માટે મા જગદંબાને પ્રાર્થના કરી હતી.

આ પણ વાંચો: Amreli News: રાજુલામાં વનવિભાગના 45 રેલવે કર્મચારીઓના શોષણનો આરોપ, પગાર-PF મુદ્દે હડતાળની ચીમકી