Jamnagar: શહેરમાં સ્વચ્છતા અને જાહેર વ્યવસ્થાને વધુ સુદૃઢ બનાવવા માટે જામનગર મહાનગરપાલિકા કમિશનરે સરપ્રાઇઝ રાઉન્ડ હાથ ધર્યો હતો. કમિશનરે દિગ્વિજય પ્લોટ-58 અને કાના નગર સહિતના વિસ્તારોની રૂબરૂ મુલાકાત લઈ સ્થળ પરની સ્થિતિનું નિરીક્ષણ કર્યું હતું.

દિગ્વિજય પ્લોટમાં સ્થળ પર તપાસ

મનપા કમિશનરે દિગ્વિજય પ્લોટ-58 તથા આસપાસના વિસ્તારોમાં મુલાકાત લઈને વિવિધ વ્યવસ્થાઓનું નિરીક્ષણ કર્યું હતું. ખાસ કરીને જાહેર માર્ગો અને આસપાસના વિસ્તારોમાં સ્વચ્છતા તથા ટ્રાફિક વ્યવસ્થાની સ્થિતિ અંગે સ્થળ પર જ માહિતી મેળવી હતી.

સોલિડ વેસ્ટ મેનેજમેન્ટની ગાડીઓનું ચેકિંગ

સ્વચ્છતા અભિયાનના ભાગરૂપે સોલિડ વેસ્ટ મેનેજમેન્ટની ગાડીઓની કામગીરીનું સ્થળ પર ચેકિંગ કરવામાં આવ્યું હતું. કચરાના યોગ્ય સંકલન અને નિકાલની કામગીરી નિયમિત તથા અસરકારક રીતે થાય તે અંગે જરૂરી સૂચનાઓ આપવામાં આવી હતી.

જાહેર માર્ગો પરથી દબાણ દૂર કરવા તાકીદ

શહેરના જાહેર માર્ગો પર ટ્રાફિકને અડચણરૂપ બનતા દબાણો અંગે પણ કમિશનરે કડક વલણ અપનાવ્યું હતું. રસ્તા પર થતા અડચણરૂપ દબાણોને તાત્કાલિક દૂર કરવા સંબંધિત તંત્રને તાકીદ કરવામાં આવી હતી, જેથી વાહનચાલકો અને રાહદારીઓને અવરજવરમાં મુશ્કેલી ન પડે.

કાના નગરમાં કચરા મામલે સૂચના

કાના નગર વિસ્તારમાં પણ કમિશનરે સ્થળ પર જઈને પરિસ્થિતિનું નિરીક્ષણ કર્યું હતું. જાહેર રોડ પર કચરો નાખતા લોકોને કડક સૂચનાઓ આપવામાં આવી હતી. જાહેર સ્થળોને ગંદા ન કરવા અને કચરો નિયત સ્થળે જ નાખવા માટે નાગરિકોને સમજાવવામાં આવ્યા હતા.

નાગરિકોના સહયોગની અપીલ

જામનગર શહેરને સ્વચ્છ, સુંદર અને સુઘડ બનાવવા માટે માત્ર મહાનગરપાલિકાની કામગીરી પૂરતી નથી, પરંતુ નાગરિકોનો સહયોગ પણ જરૂરી છે. મનપા દ્વારા નાગરિકોને જાહેર સ્થળોએ કચરો ન નાખવા અને સ્વચ્છતા જાળવવામાં સહકાર આપવા ખાસ અપીલ કરવામાં આવી છે.

મનપાના સરપ્રાઇઝ રાઉન્ડથી હવે શહેરમાં સ્વચ્છતા, દબાણ અને જાહેર માર્ગોની વ્યવસ્થા અંગેની કામગીરી વધુ કડક બનવાના સંકેત મળ્યા છે.

આ પણ વાંચો : Gopnath Mahadev:દરિયાકાંઠે બિરાજમાન આ પ્રાચીન શિવધામ સાથે જોડાયેલી છે પાંડવોની કથા, જાણો રસપ્રદ ઇતિહાસ