Jamnagar News: જિયોના ઐતિહાસિક આઈપીઓની સફળતાની અનોખી ઉજવણી, ત્રણ ગામમાં સામૂહિક ભોજન સમારંભ યોજાયો

Jamnagar News: ભારતની ડિજિટલ ક્રાંતિમાં મહત્વપૂર્ણ ભૂમિકા ભજવનારી રિલાયન્સ ગ્રુપની કંપની જિયો પ્લેટફોર્મ્સે તેની સ્થાપનાના 10 વર્ષ પૂર્ણ કર્યા છે. બીજી તરફ જિયો પ્લેટફોર્મ્સના દેશમાં અત્યાર સુધીના સૌથી મોટા આઈપીઓને મળેલા ઐતિહાસિક સબસ્ક્રિપ્શને નવા કીર્તિમાન સ્થાપિત કર્યા છે. આજે જિયોના આઈપીઓનું લિસ્ટિંગ થતાં જ દેશભરના રોકાણકારોમાં ભારે ઉત્સાહ અને રોમાંચ જોવા મળ્યો હતો.

ઐતિહાસિક સિદ્ધિની ઉજવણી કરાઈ

આ ઐતિહાસિક સિદ્ધિની ઉજવણીના ભાગરૂપે અંબાણી પરિવારે જામનગર સ્થિત રિલાયન્સની રિફાઈનરીની આસપાસના ગ્રામ્ય વિસ્તારોમાં વસતા પરિવારો માટે ભોજન સમારંભ આયોજિત કર્યા હતા. આ અનોખી સામૂહિક ઉજવણીના ભાગરૂપે આજે બપોરે રિફાઈનરીની નજીકના નાની ખાવડી, કાનાછીકારી અને ડેરાછીકારી ગામોમાં સામૂહિક ભોજન સમારંભનું આયોજન કરવામાં આવ્યું હતું. જિયો પ્લેટફોર્મ્સના શેરના લિસ્ટીંગના શુભ પ્રસંગે આ ભોજન સમારંભો થકી અંબાણી પરિવારે જામનગર રિફાઈનરી આસપાસના ગ્રામ્ય વિસ્તારોને યાદ કરી, તેમની સાથેનો આત્મીય સંબંધ જાળવી રાખ્યો હોવાની ગ્રામજનોએ લાગણી વ્યક્ત કરી હતી.

ગ્રામજનોએ જિયોની ઐતિહાસિક સિદ્ધિને પણ વધાવી લીધી

અંબાણી પરિવારે પોતાની ઐતિહાસિક સફળતાની ખુશીઓ ગ્રામજનો સાથે વહેંચીને તેમને પણ આ ઉજવણીમાં સહભાગી બનાવ્યા હતા, જે લાગણીને ગ્રામજનોએ હર્ષભેર આવકારી હતી. રિલાયન્સ ઈન્ડસ્ટ્રીઝના કોર્પોરેટ અફેર્સના ડાયરેક્ટર પરિમલ નથવાણી તથા કંપનીના ગ્રૂપ પ્રેસિડેન્ટ ધનરાજ નથવાણીના માર્ગદર્શન હેઠળ બે અલગ-અલગ સ્થળોએ યોજાયેલા આ સામૂહિક ભોજન સમારંભમાં નાની ખાવડી, કાનાછીકારી અને ડેરાછીકારી ગામના ગ્રામજનો ઉત્સાહપૂર્વક જોડાયા હતા અને પ્રીતિભોજનનો સ્વાદ માણ્યો હતો. આ પ્રસંગે ગ્રામજનોએ રિલાયન્સ ઈન્ડસ્ટ્રીઝની સફળતા બાદ જિયોની ઐતિહાસિક સિદ્ધિને પણ વધાવી લીધી હતી. સાથે જ અંબાણી પરિવાર અને રિલાયન્સ ઈન્ડસ્ટ્રીઝ પ્રત્યે પોતાની લાગણી વ્યક્ત કરતાં સૌએ તેમને હૃદયપૂર્વક આશીર્વાદ પાઠવ્યા હતા.

આ પણ વાંચો: Jio IPO Listing : જિયોની શેરબજારમાં ધમાકેદાર એન્ટ્રી, એરટેલને પાછળ છોડી દેશની બીજી સૌથી મોટી કંપની બની