Botad News: LCBએ 27 જેટલી વેબસાઈટ્સના ઓનલાઈન મની ગેમિંગ નેટવર્કનો પર્દાફાશ, બે લોકો ઝડપાયા

Botad News: ગુજરાતમાં ગેરકાયદેસર ઓનલાઈન સટ્ટા અને મની ગેમિંગ સામે પોલીસ દ્વારા કાર્યવાહી તેજ કરવામાં આવી છે. બોટાદ લોકલ ક્રાઈમ બ્રાન્ચ (LCB)એ ઓનલાઈન મની ગેમિંગ નેટવર્ક સામે મોટી કાર્યવાહી કરીને બે શખ્સોને ઝડપી પાડ્યા છે. પોલીસ તપાસમાં અંદાજે 27 જેટલી વેબસાઈટ્સના સંચાલન સાથે જોડાયેલા નેટવર્કનો ખુલાસો થયો હોવાની વિગતો સામે આવી છે.

મોબાઈલ ફોન અને લેપટોપ સહિતના સાધનો કબજે કરાયા

મળતી માહિતી મુજબ, આરોપીઓ ગેમિંગ APK અને વેબસાઈટ તૈયાર કરીને કથિત રીતે ઓનલાઈન સટ્ટા અને મની ગેમિંગનું નેટવર્ક ચલાવતા હોવાનો આક્ષેપ છે. આ મામલે બોટાદ LCBએ તપાસ હાથ ધરીને બે શખ્સોને ઝડપી પાડ્યા હતા. કાર્યવાહી દરમિયાન પોલીસ દ્વારા મોબાઇલ ફોન અને લેપટોપ સહિતનાં સાધનો કબજે કરવામાં આવ્યા છે. પ્રાથમિક તપાસમાં આ નેટવર્ક સાથે જોડાયેલી અંદાજે 27 વેબસાઈટ્સની વિગતો સામે આવી હોવાનું જણાવવામાં આવી રહ્યું છે.

આ કેસમાં પોલીસે બે અલગ-અલગ ગુના નોંધ્યા

આ વેબસાઈટ્સ કેવી રીતે સંચાલિત થતી હતી, તેમાં કયા પ્રકારની ગેમિંગ પ્રવૃત્તિઓ ચાલતી હતી અને તેની સાથે અન્ય કેટલા લોકો સંકળાયેલા હતા તે અંગે પોલીસ દ્વારા તપાસ કરવામાં આવી રહી છે. આ કેસમાં પોલીસે બે અલગ-અલગ ગુના નોંધ્યા હોવાનું જાણવા મળે છે. કબજે કરાયેલા મોબાઈલ અને લેપટોપની તપાસ દ્વારા નેટવર્કના સંચાલન, નાણાકીય વ્યવહારો અને અન્ય સંભવિત આરોપીઓ અંગે માહિતી મેળવવાનો પ્રયાસ કરવામાં આવશે.

ઓનલાઈન જુગાર અને ગેરકાયદેસર મની ગેમિંગના કારણે યુવાનો આર્થિક નુકસાનનો ભોગ બની શકે છે. આ પ્રકારની પ્રવૃત્તિઓને અટકાવવા અને સંભવિત ગેરકાયદેસર નેટવર્ક સામે કાર્યવાહી કરવા બોટાદ LCB દ્વારા તપાસ આગળ ધપાવવામાં આવી રહી છે. પોલીસ હવે આ નેટવર્કમાં અન્ય કોઈ વ્યક્તિની સંડોવણી છે કે કેમ, વેબસાઈટ્સનું સંચાલન ક્યાંથી થતું હતું અને નાણાકીય વ્યવહારો કેવી રીતે કરવામાં આવતા હતા તે દિશામાં તપાસ કરી રહી છે. આગામી તપાસમાં વધુ વિગતો બહાર આવે તેવી શક્યતા છે.

આ પણ વાંચો: Amreli News: સિંચાઈ વિભાગમાં ACBનો સપાટો, રૂપિયા 51,000ની લાંચ લેતાં જુનિયર ક્લાર્ક સહિત બે ઝડપાયા