Bhavnagar: ભાવનગર જિલ્લાના તળાજા તાલુકાના વેળાવદર ગામે વર્ષોથી ચાલી આવતી પરંપરા મુજબ બળેવ પર્વની શ્રદ્ધા અને ઉત્સાહભેર ઉજવણી કરવામાં આવી હતી. ગામના વડીલો, આગેવાનો તેમજ મોટી સંખ્યામાં ગ્રામજનોની ઉપસ્થિતિમાં ધાર્મિક અને લોકપરંપરાગત કાર્યક્રમો યોજાયા હતા.

ધજા પૂજન અને નાળિયેર વધેરવાની પરંપરા

બળેવ પર્વના દિવસે વેળાવદર ગામમાં પરંપરા મુજબ ધજાનું પૂજન અને નાળિયેર વધેરવાની વિધિ કરવામાં આવે છે. ગ્રામજનો દ્વારા ગામના આરાધ્ય દેવી-દેવતાઓ પ્રત્યે શ્રદ્ધા વ્યક્ત કરવામાં આવી હતી.

ખોડિયાર માતાજીને લાપસીનો પ્રસાદ

બળેવ પર્વની ઉજવણી દરમિયાન શ્રી ખોડિયાર માતાજીને લાપસીનો પ્રસાદ ધરાવવામાં આવ્યો હતો. ધાર્મિક વિધિમાં ગ્રામજનોએ શ્રદ્ધાપૂર્વક ભાગ લીધો હતો અને ગામ તથા ગ્રામજનોની સુખ-શાંતિ અને સમૃદ્ધિ માટે પ્રાર્થના કરવામાં આવી હતી.

હળીયા દોડમાં ગ્રામજનોનો ઉત્સાહ

વેળાવદરની બળેવ ઉજવણીનું એક ખાસ આકર્ષણ હળીયા દોડ પણ રહ્યું હતું. આ પરંપરાગત આયોજનમાં ગ્રામજનોએ ઉત્સાહપૂર્વક ભાગ લીધો હતો. વર્ષોથી ચાલી આવતી આ લોકપરંપરા આજે પણ ગામમાં જીવંત છે.

પાણી પરથી ચોમાસાની આગાહી

બળેવ પર્વ દરમિયાન ગામની એક અનોખી પરંપરા મુજબ આગામી ચોમાસું કેવું રહેશે તેની પરંપરાગત આગાહી પણ કરવામાં આવે છે. ગામના વડીલો દ્વારા ચાર ભાલિયામાં પાણી ભરવામાં આવે છે અને તેમાં થતા ફેરફારોના આધારે આગામી વર્ષના વરસાદ અંગે અનુમાન કરવામાં આવે છે.

લોકસંસ્કૃતિ જાળવવાનો પ્રયાસ

વેળાવદરની આ પરંપરા માત્ર ધાર્મિક ઉજવણી પૂરતી મર્યાદિત નથી. તે ગામની વર્ષો જૂની લોકસંસ્કૃતિ, આસ્થા અને સામૂહિક એકતાનું જીવંત ઉદાહરણ છે. નવી પેઢી પણ આ પરંપરા સાથે જોડાય અને આગામી પેઢીઓ સુધી ગામની લોકસંસ્કૃતિ જળવાઈ રહે તે હેતુથી દર વર્ષે બળેવ પર્વની ઉજવણી કરવામાં આવે છે.

આ પણ વાંચો : Uttar Pradesh: H1N1નો ખતરો વધ્યો, આરોગ્ય વિભાગ એલર્ટ; કર્મચારીઓની રજા પર પણ રોક