Morari Bapu Nepal Flood Relief: નેપાળમાં 26 ઓગસ્ટે સર્જાયેલી ભીષણ પૂર અને જળહોનારતથી થયેલી જાનહાનિ અને વિનાશને પગલે પૂજ્ય મોરારી બાપુએ દુઃખ વ્યક્ત કરીને દિવંગતોને શ્રદ્ધાંજલિ પાઠવી છે. આ દુઃખદ ઘટનાથી વ્યથિત મોરારી બાપુએ નેપાળના અસરગ્રસ્ત લોકો માટે રૂ.51 લાખની સહાય અર્પણ કરવાનો નિર્ણય કર્યો છે.

નેપાળની જળહોનારતથી ભારે વિનાશ

નેપાળમાં અચાનક આવેલા વિનાશક પૂરના કારણે અનેક લોકોના જીવ ગયા છે અને મોટા પાયે નુકસાન થયું છે. પૂર બાદ સામે આવેલા દ્રશ્યો હૃદયદ્રાવક છે. ઘટનાની ગંભીરતાને પગલે રાહત અને બચાવ કામગીરી પણ સતત ચાલી રહી છે. આ સમગ્ર ઘટનાથી વ્યથિત મોરારી બાપુએ નેપાળના લોકો પ્રત્યે સંવેદના વ્યક્ત કરી છે અને દુર્ઘટનામાં જીવ ગુમાવનાર તમામ લોકો માટે પ્રાર્થના કરી છે.

રૂ.51 લાખની સહાય બે ભાગમાં અપાશે

મોરારી બાપુ દ્વારા અર્પણ કરવામાં આવેલી રૂ.51 લાખની સહાયમાંથી રૂ.11 લાખ ચિત્રકૂટ ધામ, તલગાજરડા દ્વારા ભારતીય PM ફંડમાં જમા કરાવવામાં આવશે. જ્યારે બાકીના રૂ.40 લાખ નેપાળના વડાપ્રધાન રાહત ફંડમાં જમા કરવામાં આવશે. આ રકમની નાણાકીય સેવા મુંબઈ સ્થિત રામકથાના એક શ્રોતા દ્વારા કરવામાં આવશે.

દિવંગતો માટે હનુમાનજીના ચરણોમાં પ્રાર્થના

મોરારી બાપુએ નેપાળની આ દુર્ઘટનામાં જીવ ગુમાવનાર ભારત સહિત વિશ્વના વિવિધ દેશોના નાગરિકો માટે હનુમાનજીના ચરણોમાં પ્રાર્થના કરી છે. તેમણે તમામ દિવંગત આત્માઓના નિર્વાણ માટે પ્રાર્થના સાથે તેમના પરિવારજનો પ્રત્યે પણ સંવેદના વ્યક્ત કરી છે.

માનવતાની સેવાનો સંદેશ

કુદરતી આફતના આ કપરા સમયમાં મોરારી બાપુ દ્વારા કરવામાં આવેલી આ સહાયને માનવતાની સેવા અને સંવેદનાના પ્રયાસ તરીકે જોવામાં આવી રહી છે. નેપાળમાં અસરગ્રસ્ત લોકો સુધી રાહત પહોંચે અને મુશ્કેલીની આ ઘડીમાં તેમને સહારો મળે તે માટે વિવિધ સ્તરેથી મદદના પ્રયાસો થઈ રહ્યા છે.