Share Market Closing : સેન્સેક્સમાં 655 પોઈન્ટનો ઉછાળો, નિફ્ટી 23,450ને પાર

Share Market Closing : ભારતીય શેરબજારમાં સોમવાર, 21 સપ્ટેમ્બરે તેજી જોવા મળી હતી. ક્રૂડ ઓઈલના ભાવમાં ઘટાડાને કારણે મોંઘવારી અને આર્થિક વૃદ્ધિ અંગેની ચિંતાઓમાં ઘટાડો થતાં રોકાણકારોના સેન્ટિમેન્ટમાં સુધારો થયો હતો. બપોરે 12 વાગ્યા સુધીમાં સેન્સેક્સ 566.20 પોઈન્ટ એટલે કે 0.76 ટકા વધીને 74,861.16ના સ્તરે પહોંચ્યો હતો. જ્યારે નિફ્ટી 50માં 85.60 પોઈન્ટ એટલે કે 0.37 ટકાનો વધારો નોંધાયો હતો અને તે 23,432ના સ્તરે ટ્રેડ થઈ રહ્યો હતો.

રિલાયન્સ ઈન્ડસ્ટ્રીઝ સહિતના શેરોમાં તેજી જોવા મળી

નિફ્ટી 50માં ઈન્ટરગ્લોબ એવિએશન, સન ફાર્માસ્યુટિકલ ઇન્ડસ્ટ્રીઝ અને રિલાયન્સ ઈન્ડસ્ટ્રીઝ સહિતના શેરોમાં તેજી જોવા મળી હતી. બીજી તરફ વિવિધ સેક્ટરમાં પણ ખરીદીનું વલણ જોવા મળ્યું હતું. સેક્ટોરલ ઈન્ડેક્સની વાત કરીએ તો નિફ્ટી રિયલ્ટી ઈન્ડેક્સમાં 1.40 ટકાનો વધારો નોંધાયો હતો. FMCG સેક્ટર 1.29 ટકા અને ફાર્મા સેક્ટર 1.19 ટકા વધ્યું હતું. કન્ઝ્યુમર ડ્યુરેબલ્સમાં પણ 1.03 ટકાની તેજી જોવા મળી હતી. જોકે, મેટલ ઈન્ડેક્સમાં 0.34 ટકાનો ઘટાડો નોંધાયો હતો અને ઈન્ફ્રાસ્ટ્રક્ચર સેક્ટરમાં પણ સામાન્ય નબળાઈ જોવા મળી હતી.

EILના શેરમાં 7 ટકાથી વધુનો ઉછાળો

મિડકેપ 100 ઈન્ડેક્સમાં 0.19 ટકાનો ઘટાડો થયો હતો, જ્યારે સ્મોલકેપ 100 ઈન્ડેક્સ લગભગ સ્થિર રહ્યો હતો. બજારની અસ્થિરતા દર્શાવતો ઈન્ડિયા VIX 1.76 ટકા ઘટીને 11.19ના સ્તરે આવી ગયો હતો. આ દરમિયાન Engineers India Ltd. (EIL)ના શેરમાં સોમવારે 7 ટકાથી વધુનો ઉછાળો નોંધાયો હતો અને શેર ₹289.65ના 52 સપ્તાહના ઉચ્ચતમ સ્તરે પહોંચ્યો હતો. વર્ષ 2026માં અત્યાર સુધીમાં આ શેરમાં 40 ટકાથી વધુનો વધારો થયો છે.

કંપનીના FY26ના રેકોર્ડ પ્રદર્શન બાદ શેરમાં તેજી જોવા મળી હતી. કંપનીની ઓપરેશનમાંથી આવક વાર્ષિક ધોરણે 27.1 ટકા વધીને ₹3,849 કરોડ થઈ હતી, જ્યારે નેટ પ્રોફિટ 36.9 ટકા વધીને ₹638 કરોડના રેકોર્ડ સ્તરે પહોંચ્યો હતો. FY26ના અંતે કંપનીનું ઓર્ડર બુક ₹15,109 કરોડ હતું અને વર્ષ દરમિયાન ₹7,978 કરોડના નવા ઓર્ડર મળ્યા હતા. ત્યારબાદ ઓર્ડર બુક વધીને અંદાજે ₹17,000 કરોડ થઈ છે.

નોંધ - શેરબજાર કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ જરૂર લેવી.

આ પણ વાંચો : Assam : અદાણી પાવરના 3,200 મેગાવોટના પ્રકલ્પનો શિલાન્યાસ, ₹48,000 કરોડનું કરશે રોકાણ