Reliance Industries બોન્ડ વેચીને એકત્ર કરશે 12,500 કરોડ રૂપિયા, રોકાણકારોને મળશે તગડું રિટર્ન

Reliance Industries : ભારતની સૌથી મોટી માર્કેટ-વેલ્યુ ધરાવતી કંપની રિલાયન્સ ઈન્ડસ્ટ્રીઝ ફરી એકવાર સ્થાનિક બોન્ડ માર્કેટમાંથી મોટું ફંડ એકત્ર કરવા જઈ રહી છે. કંપની પાંચ વર્ષના બોન્ડ મારફતે ₹12,500 કરોડ એકત્ર કરવાની તૈયારીમાં છે. આ રિલાયન્સનું નવેમ્બર 2023 બાદનું પ્રથમ મોટું સ્થાનિક બોન્ડ ઈશ્યૂ છે.

રોકાણકારોને વાર્ષિક આશરે 7.47 ટકા રિટર્ન મળશે

આ બોન્ડ ઈશ્યૂનું બેઝ સાઈઝ ₹10,000 કરોડ રાખવામાં આવ્યું છે, જ્યારે વધારાના ₹2,500 કરોડ માટે ગ્રીનશૂ વિકલ્પ રાખવામાં આવ્યો છે. બોન્ડ પર રોકાણકારોને વાર્ષિક આશરે 7.47 ટકા રિટર્ન મળશે. ઈશ્યૂ માટે રોકાણકારો પાસેથી બિડિંગ 18 સપ્ટેમ્બર સુધીમાં થવાની છે. આ સમગ્ર ટ્રાન્ઝેક્શન માટે દેશની કેટલીક મોટી બેન્કો વ્યવસ્થા કરી રહી છે. તેમાં Axis Bank, HDFC Bank, ICICI Bank અને YES BANKનો સમાવેશ થાય છે.

2023માં પણ બોન્ડ ઈશ્યુ કર્યા હતા

રિલાયન્સે અગાઉ નવેમ્બર 2023માં સ્થાનિક બજારમાં ₹20,000 કરોડના બોન્ડ જાહેર કર્યા હતા. હાલના ઈશ્યૂનો સમય એવા સમયે આવ્યો છે જ્યારે ભારતીય બેન્કિંગ સિસ્ટમમાં વિદેશી ચલણની થાપણો અને અન્ય પ્રવાહને કારણે લિક્વિડિટી વધી છે. 31 ઓગસ્ટ સુધી વિશેષ FCNR-B સુવિધા હેઠળ બેન્કોએ લગભગ $127.2 અબજ એકત્ર કર્યા હતા. આ વધેલી લિક્વિડિટીના કારણે બેન્કો પાસે કોર્પોરેટ લોન અને બોન્ડ જેવા સાધનોમાં નાણાં મૂકવાની ક્ષમતા વધી છે. રિલાયન્સનો ₹12,500 કરોડનો બોન્ડ ઈશ્યૂ આ બદલાયેલા બજારમાં મોટા કોર્પોરેટ ફંડ રેઝિંગ તરીકે સામે આવ્યો છે.

આ પણ વાંચો : Gold Silver Price Today: સોના-ચાંદીના ભાવમાં જોરદાર ઉછાળો! સોનું ₹1.53 લાખને પાર, ચાંદી ₹3,800થી વધુ મોંઘી