Bakhtiyarpur Railway Station Train Accident: રેલવે સ્ટેશનો પર ફૂટ ઓવરબ્રિજનો ઉપયોગ કરવા માટે વારંવાર કરવામાં આવતી અપીલ છતાં, ઉતાવળમાં પાટા ક્રોસ કરવાની ભૂલ જીવલેણ સાબિત થઈ રહી છે. બખ્તિયારપુર રેલવે સ્ટેશન પર પ્લેટફોર્મ પાર કરતી વખતે બે મહિલાઓનું ટ્રેન નીચે આવી જવાથી કમકમાટીભર્યું મોત નીપજ્યું છે.

પ્લેટફોર્મ પર ચઢે તે પહેલા જ કાળ ભેટ્યો
આ ઘટના ત્યારે બની જ્યારે દિલ્હીથી માલદા જઈ રહેલી ફરક્કા એક્સપ્રેસ પ્લેટફોર્મ નંબર 1 પર પૂરઝડપે આવી રહી હતી. તે જ સમયે બે મહિલાઓ રેલવે પાટા ક્રોસ કરીને પ્લેટફોર્મ પર ચઢવાનો પ્રયાસ કરી રહી હતી. મહિલાઓ પ્લેટફોર્મની ધાર સુધી પહોંચી પણ ગઈ હતી, પરંતુ તેઓ ઉપર ચઢી શકે તે પહેલા જ ટ્રેને તેમને અડફેટે લીધી હતી. ટ્રેનની સ્પીડ એટલી વધારે હતી કે જોતજોતામાં બંને મહિલાઓના ચીંથરા ઉડી ગયા હતા.

મદદ કરવા દોડેલા લોકો પણ લાચાર બન્યા
ઘટના સમયે હાજર કેટલાક મુસાફરોએ મહિલાઓને પ્લેટફોર્મ પર ખેંચી લેવા માટે હાથ પણ લંબાવ્યો હતો, પરંતુ ધસમસતી આવતી ટ્રેનની ગતિ જોઈને તેઓ પણ ડરીને પાછળ હટી ગયા હતા. લોકોની નજર સામે જ આ કરુણ દુર્ઘટના ઘટી અને બંને મહિલાઓએ ઘટનાસ્થળે જ દમ તોડ્યો હતો.

રેલવેની અપીલ: ઉતાવળમાં જીવ જોખમમાં ન મૂકો
આ અકસ્માત બાદ રેલવે વહીવટીતંત્ર દ્વારા ફરી એકવાર મુસાફરોને નમ્ર વિનંતી કરવામાં આવી છે કે, પ્લેટફોર્મ પર એક બાજુથી બીજી બાજુ જવા માટે હંમેશા ફૂટ ઓવરબ્રિજ (પુલ) નો જ ઉપયોગ કરવો. પાટા ક્રોસ કરવા એ ગુનો તો છે જ, પરંતુ તે તમારા જીવન માટે કાયમી જોખમ પણ છે.