મહારાષ્ટ્રમાં સતત વરસી રહેલા ભારે વરસાદે જનજીવનને અસ્તવ્યસ્ત બનાવી દીધું છે. ઠાણે જિલ્લાના મુમ્બ્રા વિસ્તારમાં વરસાદી પાણીમાં વીજ કરંટ ફેલાતા 17 વર્ષની એક કિશોરીનું કરુણ મોત થયું છે. આ ઘટનાએ સ્થાનિકોમાં ભારે આક્રોશ ફેલાવ્યો છે અને વીજ વિભાગની કામગીરી સામે ગંભીર સવાલો ઊભા કર્યા છે.

માહિતી અનુસાર, કિશોરી પોતાના પિતાની દુકાન તરફ જવા માટે રસ્તો પાર કરી રહી હતી. ભારે વરસાદને કારણે રસ્તા પર પાણી ભરાઈ ગયું હતું. પરિવારજનોના આક્ષેપ મુજબ, પાણીમાં વીજ કરંટ ફેલાયો હતો અને કિશોરીએ પાણીમાં પગ મૂકતા જ તેને જોરદાર વીજ ઝટકો લાગ્યો. તે ઘટનાસ્થળે જ ઢળી પડી હતી. તાત્કાલિક મદદ પહોંચે તે પહેલાં જ તેનું મોત થયું હતું. મુમ્બ્રા પોલીસે કેસ નોંધ્યો છે અને સમગ્ર ઘટનાની તપાસ શરૂ કરી છે.

મૃતકાના કાકા મોહમ્મદ ચાંદીવાલાએ વીજ વિભાગની બેદરકારીને આ દુર્ઘટના માટે જવાબદાર ગણાવી છે અને દોષિતો સામે કડક કાર્યવાહી કરવાની માંગ કરી છે.

બીજી તરફ, ભારે વરસાદના કારણે મુંબઈ શહેરમાં પણ સામાન્ય જનજીવન પર વ્યાપક અસર જોવા મળી રહી છે. દાદર, પરેલ, હિંદમાતા, ચારકોપ, વર્લી, ગોરેગાંવ અને અંધેરી સહિતના અનેક નીચાણવાળા વિસ્તારોમાં પાણી ભરાઈ જતા વાહન વ્યવહાર ખોરવાયો છે. અનેક માર્ગો પર ટ્રાફિક ધીમો પડ્યો હતો, જ્યારે ઉપનગરીય લોકલ ટ્રેનો પણ 10થી 15 મિનિટના વિલંબ સાથે દોડી હતી.

ભારતીય હવામાન વિભાગ (IMD)એ મુંબઈ અને આસપાસના વિસ્તારોમાં ભારેથી અતિભારે વરસાદની આગાહી કરી છે. સાથે જ 50થી 60 કિલોમીટર પ્રતિ કલાકની ઝડપે પવન ફૂંકાવાની પણ શક્યતા વ્યક્ત કરી છે. બૃહન્મુંબઈ મહાનગરપાલિકા (BMC)એ નાગરિકોને સાવચેતી રાખવા અને જરૂરી ન હોય તો બહાર ન નીકળવાની અપીલ કરી છે. પૂર્વી ઉપનગરોમાં છેલ્લા 24 કલાક દરમિયાન 200 મીમીથી વધુ વરસાદ નોંધાતા સ્થિતિ વધુ ગંભીર બની છે.