વડાપ્રધાન નરેન્દ્ર મોદી અને જાપાનના વડાપ્રધાન સાને તાકાઇચી ગુરુવારે નવી દિલ્હીમાં યોજાનારી 16મી ભારત-જાપાન વાર્ષિક શિખર બેઠકમાં ભાગ લેશે. બંને દેશો વચ્ચેના વ્યૂહાત્મક, આર્થિક અને વૈશ્વિક સહકારને વધુ મજબૂત બનાવવાના હેતુથી યોજાનારી આ બેઠકમાં દ્વિપક્ષીય સંબંધોના તમામ મહત્વપૂર્ણ પાસાઓની સમીક્ષા કરવામાં આવશે. સાથે જ પ્રાદેશિક અને વૈશ્વિક મુદ્દાઓ પર પણ વિસ્તૃત ચર્ચા થશે.

ત્રણ દિવસના સત્તાવાર ભારત પ્રવાસે આવેલા વડાપ્રધાન સાને તાકાઇચીનું ગુરુવારે રાષ્ટ્રપતિ ભવન ખાતે ઔપચારિક સ્વાગત કરવામાં આવશે. તેઓ બુધવારે સાંજે નવી દિલ્હી પહોંચ્યા હતા. ભારતના વિદેશ મંત્રાલયે તેમના આગમનને ભારત-જાપાન વચ્ચેની વિશેષ વ્યૂહાત્મક અને વૈશ્વિક ભાગીદારીને વધુ મજબૂત બનાવવાની દિશામાં મહત્વપૂર્ણ પગલું ગણાવ્યું છે.

ભારતમાં જાપાનના રાજદૂત ઓનો કેઇચીએ જણાવ્યું કે આ મુલાકાત બંને દેશો વચ્ચે લોકો-થી-લોકો સંપર્ક વધારવાની તેમજ લાંબા ગાળાના સહયોગને નવી ગતિ આપવાની ઉત્તમ તક છે. વિદેશ મંત્રાલય દ્વારા આયોજિત માનવ સંસાધન ગતિશીલતા ફોરમમાં પણ ભારત અને જાપાન વચ્ચે કુશળ માનવશક્તિ, રોજગાર અને પ્રતિભા વિનિમય જેવા ક્ષેત્રોમાં વધતા સહકાર પર ભાર મૂકવામાં આવ્યો હતો.

ભારત માટે રવાના થતાં પહેલાં ટોક્યોમાં મીડિયા સાથે વાત કરતાં વડાપ્રધાન તાકાઇચીએ જણાવ્યું હતું કે તેમની મુલાકાતનો મુખ્ય ઉદ્દેશ ભારત સાથે વ્યૂહાત્મક ભાગીદારીને વધુ ગાઢ બનાવવાનો, આર્થિક સુરક્ષા ક્ષેત્રે સહયોગ વધારવાનો અને રોકાણ તથા નવીનતા ક્ષેત્રે બંને દેશોના ઉદ્યોગો વચ્ચે જોડાણ મજબૂત કરવાનો છે.

તેમણે જણાવ્યું કે ભારત-જાપાન સંયુક્ત આર્થિક મંચમાં 150થી વધુ જાપાની કંપનીઓ અને વ્યાવસાયિક સંસ્થાઓના પ્રતિનિધિઓ ભાગ લેશે, જેનાથી દ્વિપક્ષીય વેપાર અને રોકાણને નવી ગતિ મળશે.

તાકાઇચીએ ભારપૂર્વક કહ્યું કે હિંદ-પ્રશાંત ક્ષેત્રમાં શાંતિ અને સ્થિરતા જાળવવાની જવાબદારી ભારત અને જાપાન બંનેની છે. તેમણે વડાપ્રધાન મોદી સાથે ફ્રી એન્ડ ઓપન ઇન્ડો-પેસિફિક (FOIP) અને ક્વાડ માળખા હેઠળના સહયોગ સહિત વિવિધ વ્યૂહાત્મક મુદ્દાઓ પર વિસ્તૃત ચર્ચા કરવાની આશા વ્યક્ત કરી છે. તેમના પ્રવાસ દરમિયાન તેઓ એક બિઝનેસ ફોરમમાં પણ હાજરી આપશે.