Kedarnath Accident: ઉત્તરાખંડના કેદારનાથ ટ્રેકિંગ માર્ગ પર શોર્ટકટ લેવાનો પ્રયાસ બે યુવાનો માટે જીવલેણ સાબિત થયો છે. ટ્રેક દરમિયાન પગ લપસતા બંને યુવકો ઊંડી ખીણમાં ખાબક્યા હતા. આ દુર્ઘટનામાં એક યુવકનું મોત થયું છે, જ્યારે અન્ય એક ગંભીર રીતે ઘાયલ થયો છે.

જિલ્લા ઇમરજન્સી ઓપરેશન સેન્ટર (DEOC) અનુસાર ઘટના કેદારનાથ પદયાત્રા માર્ગ પર પોલ નંબર 337 અને 340 વચ્ચે બની હતી. બંને યુવાનો અધિકૃત માર્ગ છોડીને એક અનધિકૃત શોર્ટકટ રસ્તેથી નીચે ઉતરી રહ્યા હતા. આ દરમિયાન તેમનો પગ લપસતાં તેઓ સીધા જ ઊંડી ખીણમાં પટકાયા હતા.

ઘટનાની જાણ થતાં જ SDRF, પોલીસ અને YMFની ટીમો તાત્કાલિક સ્થળ પર પહોંચી હતી અને બચાવ કામગીરી શરૂ કરી હતી. રેસ્ક્યૂ દરમિયાન એક ઘાયલ યુવકને બહાર કાઢીને સારવાર માટે નાની લિંચોલી સ્થિત મેડિકલ રિલીફ પોઇન્ટ ખાતે ખસેડવામાં આવ્યો હતો.

ઘાયલ યુવકની ઓળખ દિલ્હીના ગોકુલપુરી વિસ્તારમાં રહેતા 27 વર્ષીય મોહિત તરીકે થઈ છે. પ્રાથમિક તપાસમાં તેના પગમાં ફ્રેક્ચર હોવાનું સામે આવ્યું છે. તેને વધુ સારવાર માટે ગૌરીકુંડ રિફર કરવામાં આવ્યો છે.

જ્યારે અન્ય યુવક પ્રિયાંશુ શુક્લા (27), જે ઉત્તર પ્રદેશના ફરુખાબાદનો રહેવાસી હતો, તેને પણ બચાવીને ભીમબલી મેડિકલ રિલીફ સેન્ટર ખાતે લઈ જવામાં આવ્યો હતો. જોકે ડૉક્ટરોએ તપાસ બાદ તેને મૃત જાહેર કર્યો હતો.

અધિકારીઓના જણાવ્યા મુજબ મૃતકનો મૃતદેહ ગૌરીકુંડ લાવવામાં આવી રહ્યો છે, ત્યારબાદ પોસ્ટમોર્ટમ અને અન્ય કાનૂની કાર્યવાહી માટે તેને રુદ્રપ્રયાગ જિલ્લા હોસ્પિટલમાં મોકલવામાં આવશે.

ઉલ્લેખનીય છે કે કેદારનાથ યાત્રા દરમિયાન ભારે ભીડ અને પડકારજનક હવામાનને કારણે આરોગ્ય વિભાગ હાઈ એલર્ટ પર છે. ગંભીર રીતે બીમાર અથવા ઘાયલ યાત્રાળુઓને હેલિકોપ્ટર મારફતે ફાટા અને ગુપ્તકાશી ખાતે સારવાર માટે ખસેડવામાં આવી રહ્યા છે. જરૂરીયાત મુજબ દર્દીઓને એર એમ્બ્યુલન્સ દ્વારા ઉચ્ચ તબીબી કેન્દ્રો, જેમાં AIIMSનો પણ સમાવેશ થાય છે, ત્યાં પહોંચાડવામાં આવી રહ્યા છે.