અમેરિકા L અમેરિકાએ ઈરાનમાં બુધવારે મોડી રાત્રે સૈન્ય કાર્યવાહી કરતા એક મહત્વપૂર્ણ સૈન્ય ઠેકાણાને નિશાન બનાવ્યું હોવાનું અમેરિકી મીડિયા રિપોર્ટમાં જણાવાયું છે. અમેરિકા તરફથી દાવો કરવામાં આવ્યો છે કે આ ઠેકાણું અમેરિકી સૈનિકો અને સમુદ્રી વેપાર માટે જોખમરૂપ હતું.

ડ્રોનને હવામાં જ તોડી પાડ્યાનો દાવો

સીબીએસ ન્યૂઝના અહેવાલ મુજબ, અમેરિકી સેનાએ ઈરાન તરફથી છોડવામાં આવેલા ડ્રોનને હવામાં જ તોડી પાડ્યા હતા. અમેરિકી અધિકારીઓએ આ સમગ્ર કાર્યવાહીને “રક્ષાત્મક પગલું” ગણાવ્યું છે.

બંદર અબ્બાસ પોર્ટ પાસે ધડાકા

ઈરાનની ફાર્સ ન્યૂઝ એજન્સી અનુસાર, હોર્મુઝ સ્ટ્રેટ નજીક આવેલા બંદર અબ્બાસ શહેરના પૂર્વીય વિસ્તારમાં ગુરુવારે વહેલી સવારે આશરે 1:30 વાગ્યે ત્રણ જોરદાર ધડાકા સંભળાયા હતા. ધડાકા બાદ સમગ્ર વિસ્તારમાં તણાવ ફેલાયો હતો.

એર ડિફેન્સ સિસ્ટમ તાત્કાલિક સક્રિય

ધડાકાની ઘટના બાદ ઈરાનની એર ડિફેન્સ સિસ્ટમ તરત જ સક્રિય કરવામાં આવી હતી. સુરક્ષા એજન્સીઓ દ્વારા ધડાકાના સ્ત્રોતની તપાસ હાથ ધરવામાં આવી છે.

ટ્રમ્પે આપી નવી સૈન્ય કાર્યવાહીની ચેતવણી

અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે જો ઈરાન સાથેની ચાલી રહેલી વાટાઘાટોમાં અમેરિકા મુજબ યોગ્ય સમજૂતી નહીં થાય તો ફરી સૈન્ય કાર્યવાહી કરવામાં આવી શકે છે. તેમણે કહ્યું કે મધ્યાવધિ ચૂંટણીના દબાણને કારણે તેઓ કોઈ ઉતાવળમાં નિર્ણય નહીં લે.

“ઈરાન પાસે અન્ય વિકલ્પ નથી”

વ્હાઇટ હાઉસમાં યોજાયેલી કેબિનેટ બેઠક દરમિયાન ટ્રમ્પે કહ્યું કે ઈરાન હવે કોઈપણ રીતે સમજૂતી કરવા માગે છે. તેમણે દાવો કર્યો કે “મને નથી લાગતું કે તેમની પાસે બીજો કોઈ વિકલ્પ છે.”

ઈરાની મીડિયા રિપોર્ટને અમેરિકા તરફથી ફગાવાયો

વ્હાઇટ હાઉસે ઈરાની મીડિયામાં આવેલા એક ડ્રાફ્ટ સમજૂતીના અહેવાલને સંપૂર્ણ ખોટો ગણાવ્યો હતો. ઈરાની મીડિયામાં દાવો થયો હતો કે અમેરિકા ઈરાન નજીકના વિસ્તારોમાંથી સૈન્ય હટાવશે અને ઈરાની બંદરો પરની નૌકાદળ સંબંધિત મર્યાદાઓ દૂર કરશે.

પ્રતિબંધોમાં રાહત નહીં મળે: ટ્રમ્પ

ટ્રમ્પે સ્પષ્ટ શબ્દોમાં કહ્યું કે ઈરાન પોતાના અત્યંત સમૃદ્ધ યુરેનિયમનો જથ્થો છોડશે તો પણ તેને કોઈ પ્રકારની પ્રતિબંધ રાહત આપવામાં નહીં આવે. પીબીએસ ન્યૂઝ સાથેની વાતચીતમાં તેમણે કહ્યું, “કોઈ પણ પ્રકારની પ્રતિબંધ રાહત નહીં મળે.”

મધ્ય પૂર્વમાં ફરી વધ્યો તણાવ

અમેરિકા અને ઈરાન વચ્ચે વધતી સૈન્ય ગતિવિધિઓને કારણે મધ્ય પૂર્વમાં ફરી તણાવપૂર્ણ સ્થિતિ સર્જાઈ છે. ખાસ કરીને હોર્મુઝ સ્ટ્રેટ નજીક બનેલી ઘટનાઓને કારણે વૈશ્વિક વેપાર અને તેલ બજાર પર પણ તેની અસર પડી શકે તેવી આશંકા વ્યક્ત થઈ રહી છે.