જયપુર: રાજસ્થાનની રાજધાની જયપુરમાં શહેરી પરિવહનને વધુ આધુનિક અને સુવિધાસભર બનાવવા માટે એક મહત્વપૂર્ણ પગલું ભરવામાં આવી રહ્યું છે. પ્રધાનમંત્રી નરેન્દ્ર મોદી 4 જુલાઈએ ₹13,037 કરોડના ખર્ચે તૈયાર થનારી જયપુર મેટ્રો ફેઝ-2 યોજનાનું શિલાન્યાસ કરશે. આ પ્રોજેક્ટ પૂર્ણ થયા બાદ શહેરને આશરે 41 કિલોમીટર લાંબી નવી મેટ્રો લાઇનનો લાભ મળશે. જયપુર મેટ્રો ફેઝ-2 અંતર્ગત પ્રહલાદપુરાથી ટોડી મોડ સુધી ઉત્તર-દક્ષિણ કોરિડોર વિકસાવવામાં આવશે. આ મેટ્રો રૂટ શહેરના મહત્વના ઔદ્યોગિક, વ્યાવસાયિક અને રહેણાંક વિસ્તારોને ઝડપી અને સરળ પરિવહન વ્યવસ્થા સાથે જોડશે.

36 નવા મેટ્રો સ્ટેશન બનશે
આ પ્રોજેક્ટ હેઠળ કુલ 36 નવા મેટ્રો સ્ટેશનનું નિર્માણ કરવામાં આવશે. મેટ્રો રૂટ સીતાાપુરા ઇન્ડસ્ટ્રીયલ એરિયા, વિશ્વકર્મા ઇન્ડસ્ટ્રીયલ એરિયા (VKIA), જયપુર આંતરરાષ્ટ્રીય એરપોર્ટ, ટોંક રોડ, એસએમએસ હોસ્પિટલ, એસએમએસ સ્ટેડિયમ, કલેક્ટરેટ, જયપુર રેલવે સ્ટેશન, અંબાબાડી અને વિદ્યાધર નગર જેવા મહત્વના વિસ્તારોને સીધા જોડશે.

એરપોર્ટ માટે અન્ડરગ્રાઉન્ડ સ્ટેશન
મેટ્રો ફેઝ-2માં એરપોર્ટ વિસ્તાર માટે ખાસ અન્ડરગ્રાઉન્ડ મેટ્રો સ્ટેશન બનાવવાની યોજના છે. આ સ્ટેશનોને હાલના મેટ્રો નેટવર્ક સાથે જોડવામાં આવશે જેથી મુસાફરોને સરળ અને સતત મુસાફરીની સુવિધા મળી શકે.

પ્રથમ તબક્કાનું કામ શરૂ
કેન્દ્ર સરકારની મંજૂરી બાદ રાજસ્થાન મેટ્રો રેલ કોર્પોરેશન લિમિટેડ (RMRCL) દ્વારા પ્રથમ નિર્માણ પેકેજ માટે ₹918 કરોડથી વધુની મંજૂરી આપવામાં આવી છે. આ તબક્કામાં પ્રહલાદપુરાથી પિંજરાપોળ ગૌશાળા સુધી 12 કિલોમીટર લાંબો એલિવેટેડ કોરિડોર બનાવાશે. આ રૂટ પર પ્રહલાદપુરા, માનપુરા, બિલવા કલા, બિલવા, ગોનેર મોડ, સીતાાપુરા, JECC, કુંભા માર્ગ, હલદીઘાટી ગેટ અને પિંજરાપોળ ગૌશાળા સહિત 10 સ્ટેશન વિકસાવવામાં આવશે.

રોજના 2.5 લાખ મુસાફરોને લાભ
હાલમાં જયપુર મેટ્રો ફેઝ-1 હેઠળ માનસરોવરથી મોટી ચોપડ સુધી 11.64 કિમી લાંબી મેટ્રો સેવા કાર્યરત છે, જેમાં દરરોજ અંદાજે 50 હજાર મુસાફરો મુસાફરી કરે છે. ફેઝ-2 પૂર્ણ થયા બાદ મેટ્રોની દૈનિક મુસાફરોની સંખ્યા વધીને આશરે 2.5 લાખ સુધી પહોંચી શકે છે. આગામી વર્ષોમાં આ આંકડો 4 લાખથી વધુ થવાનો અંદાજ વ્યક્ત કરવામાં આવ્યો છે.

મલ્ટી-મોડલ ટ્રાન્સપોર્ટ સિસ્ટમને મળશે વેગ
આ પ્રોજેક્ટને એરપોર્ટ, રેલવે સ્ટેશન અને મુખ્ય બસ સ્ટેન્ડ સાથે સંકલિત કરવામાં આવશે. ઉપરાંત ચાકસૂ અને ચોમૂ જેવા નજીકના શહેરોમાંથી મુસાફરોને મેટ્રો સ્ટેશન સુધી પહોંચાડવા માટે ફીડર બસ સેવા શરૂ કરવાની પણ યોજના તૈયાર કરવામાં આવી રહી છે. જયપુર મેટ્રો ફેઝ-2 પ્રોજેક્ટને રાજસ્થાનના શહેરી વિકાસ અને આધુનિક પરિવહન ક્ષેત્ર માટે એક મહત્વપૂર્ણ માઇલસ્ટોન માનવામાં આવી રહ્યો છે.