IndiGo Flight Lightning at Kolkata Airport: કોલકાતા એરપોર્ટ પર શુક્રવારે સાંજે આંધી-તોફાન દરમિયાન ઇન્ડિગોની એક ફ્લાઇટ પર વીજળી પડવાની ઘટના સામે આવી છે. અગરતલા જવા તૈયાર થયેલી ફ્લાઇટ ટેકઓફ પહેલાં રનવે નજીક ઉભી હતી ત્યારે અચાનક વીજળી પડતાં મુસાફરોમાં ગભરાટ ફેલાયો હતો. માહિતી મુજબ, ઇન્ડિગોની એરબસ A320neo ફ્લાઇટમાં ક્રૂ સભ્યો સહિત 141થી વધુ લોકો સવાર હતા. બોર્ડિંગ પ્રક્રિયા પૂર્ણ થઈ ગઈ હતી અને વિમાન ટેકઓફ માટે તૈયાર હતું. તે દરમિયાન ભારે વરસાદ અને ગાજવીજ સાથે વાતાવરણ બગડતાં વીજળી સીધી વિમાન પર પડી હતી.

ઘટના બાદ સુરક્ષા નિયમો અનુસાર તમામ મુસાફરોને સલામત રીતે વિમાનમાંથી બહાર કાઢવામાં આવ્યા હતા. વિમાનની તકનિકી તપાસ હાથ ધરવામાં આવી હતી અને ત્યારબાદ મુસાફરોને અન્ય વિમાન મારફતે અગરતલા મોકલવાની વ્યવસ્થા કરવામાં આવી હતી. સૂત્રોના જણાવ્યા અનુસાર, ઘટનામાં ગ્રાઉન્ડ સ્ટાફના બે સભ્યોને સામાન્ય ઇજા પહોંચી હતી, જેમને સારવાર માટે ખસેડવામાં આવ્યા હતા. હાલ બંનેની સ્થિતિ સ્થિર હોવાનું જાણવા મળ્યું છે.

એવિએશન નિષ્ણાતોના જણાવ્યા મુજબ આધુનિક વિમાનોમાં ખાસ પ્રકારની સુરક્ષા વ્યવસ્થા હોય છે, જેના કારણે વીજળી પડ્યા બાદ પણ મુસાફરોને સીધું નુકસાન થતું નથી. જોકે આવી ઘટનામાં વિમાનની સંપૂર્ણ તકનિકી તપાસ ફરજિયાત કરવામાં આવે છે. હાલમાં નુકસાનગ્રસ્ત વિમાનને વધુ તપાસ માટે સેવામાંથી તાત્કાલિક દૂર રાખવામાં આવ્યું છે અને સમગ્ર ઘટનાની તપાસ ચાલી રહી છે.