નવી દિલ્હી: કેન્દ્રીય ગૃહ અને સહકારિતા મંત્રી અમિત શાહે દેશના કોલસા ક્ષેત્રમાં વધી રહેલા અવૈધ ખનન અને કોલસા ચોરીના મુદ્દે ગંભીર ચિંતા વ્યક્ત કરી છે. નવી દિલ્હીમાં યોજાયેલી ઉચ્ચસ્તરીય સમીક્ષા બેઠકમાં તેમણે કોલસા મંત્રાલય, CISF અને અન્ય એજન્સીઓને સંકલિત અને સમયબદ્ધ કાર્યવાહી કરવા સ્પષ્ટ સૂચનાઓ આપી હતી. બેઠકમાં કેન્દ્રીય કોલસા અને ખાણ મંત્રી જી. કિશન રેડ્ડી, ગૃહ સચિવ, કોલસા સચિવ, કોલ ઈન્ડિયા લિમિટેડ, BCCL અને CISFના વરિષ્ઠ અધિકારીઓ હાજર રહ્યા હતા.

ધનબાદમાં વધતી સમસ્યા પર ચિંતા
સમીક્ષા દરમિયાન અમિત શાહે ખાસ કરીને ધનબાદ અને આસપાસના વિસ્તારોમાં વધી રહેલા અવૈધ કોલસા ખનન અને ચોરીના બનાવો અંગે ચિંતા વ્યક્ત કરી હતી. અધિકારીઓએ તેમને માહિતી આપી કે અગાઉની સમીક્ષા બેઠક બાદ અનેક કડક પગલાં લેવામાં આવ્યા છે. હવે CISF અને કોલ ઈન્ડિયા લિમિટેડના અધિકારીઓને ‘ખાન અને ખનિજ (વિકાસ અને વિનિયામન) અધિનિયમ, 1957’ હેઠળ તપાસ, દરોડા, જપ્તી અને કાનૂની કાર્યવાહી કરવાની સત્તા આપવામાં આવી છે.

‘ઝીરો કોલ લીકેજ પ્લાન’ અમલમાં મૂકવાનો નિર્દેશ
અમિત શાહે અવૈધ ખનન અને કોલસાના ગેરકાયદે પરિવહનને રોકવા માટે ‘ઝીરો કોલ લીકેજ પ્લાન’ને અસરકારક રીતે અમલમાં મૂકવા જણાવ્યું હતું. તેમણે ભારપૂર્વક કહ્યું કે CISF અને કોલ ઈન્ડિયા દ્વારા મળેલી સત્તાઓનો ઉપયોગ મંજૂર SOP મુજબ અને સંકલન સાથે થવો જોઈએ.

GST અને E-Way Bill ચેકિંગ પર ભાર
ગૃહમંત્રીએ કોલસાના ગેરકાયદે વેપારને રોકવા માટે GST વિભાગને પણ પ્રક્રિયામાં સામેલ કરવાની જરૂરિયાત દર્શાવી હતી. તેમણે તમામ કોલસા પરિવહન માટે E-Way Billની ફરજિયાત ચકાસણીની વ્યવસ્થા ઉભી કરવાની સૂચના આપી.

સંવેદનશીલ વિસ્તારોમાં CISFની ખાસ ટીમો
અમિત શાહે ગૃહ મંત્રાલયને સંવેદનશીલ કોલસા વિસ્તારોમાં CISFની તાત્કાલિક તૈનાતી માટે પ્રાથમિકતા આપવા જણાવ્યું હતું. સાથે જ CISFને ‘ક્વિક રિસ્પોન્સ ટીમ’ (QRT) રચવા અને બહુસ્તરીય સુરક્ષા વ્યવસ્થા ઉભી કરવા નિર્દેશ આપ્યો હતો.

ટેક્નોલોજીથી થશે કડક દેખરેખ
અવૈધ ખનન સામે વધુ અસરકારક કાર્યવાહી માટે હાઈ-રિઝોલ્યુશન કેમેરા અને ઇન્ટિગ્રેટેડ કમાન્ડ એન્ડ કંટ્રોલ સેન્ટરનો ઉપયોગ વધારવા પર પણ ભાર મૂકવામાં આવ્યો હતો. સરકારનો હેતુ જાહેર સંપત્તિનું રક્ષણ, કાયદો અને વ્યવસ્થા જાળવવી અને કાયદેસર કોલસા ખનન પ્રવૃત્તિઓના હિતોની સુરક્ષા કરવાનો છે.