ઇંગ્લેન્ડ એ સામે રમાનારી વનડે અને ટી20 શ્રેણી માટે ભારત એ મહિલા ક્રિકેટ ટીમમાં મહત્વપૂર્ણ ફેરફારો કરવામાં આવ્યા છે. મહિલા પસંદગી સમિતિએ જાહેર કરેલા નવા સ્ક્વોડ મુજબ નિકી પ્રસાદ અને મિન્નૂ મણિને ટીમમાં સ્થાન આપવામાં આવ્યું છે. નિકી પ્રસાદને ભારત એની ટી20 ટીમમાં જ્યારે મિન્નૂ મણિને વનડે ટીમમાં સામેલ કરવામાં આવ્યા છે. બંને ખેલાડીઓને પ્રેમા રાવતના સ્થાને તક આપવામાં આવી છે.

પ્રેમા રાવતને મહિલા ટી20 વર્લ્ડ કપ 2026 માટે ભારતીય રાષ્ટ્રીય ટીમમાં સામેલ કરવામાં આવતા ભારત એ ટીમમાંથી મુક્ત કરવામાં આવી છે. પ્રેમાને શ્રેયંકા પાટીલના સ્થાને રાષ્ટ્રીય ટીમમાં તક મળી છે. શ્રેયંકા પાટીલને નેધરલેન્ડ્સ સામેના મુકાબલા દરમિયાન  ઘૂંટીમાં ગંભીર ઇજા પહોંચી હતી. બોલિંગ દરમિયાન તેમનો ટખો વળી જતાં તેમને સ્ટ્રેચર મારફતે મેદાનની બહાર લઈ જવામાં આવ્યા હતા. આ ઇજાના કારણે તેઓ સમગ્ર ટૂર્નામેન્ટમાંથી બહાર થઈ ગઈ છે.

બીસીસીઆઈએ પોતાના સત્તાવાર નિવેદનમાં જણાવ્યું કે મહિલા પસંદગી સમિતિએ ઇંગ્લેન્ડ એ સામેની આગામી શ્રેણી માટે ભારત એ ટીમમાં જરૂરી ફેરફારો કર્યા છે. અગાઉ નિકી પ્રસાદ માત્ર વનડે ટીમનો ભાગ હતી, પરંતુ હવે તેમને ટી20 સ્ક્વોડમાં પણ સામેલ કરવામાં આવી છે. બીજી તરફ, મિન્નૂ મણિ પહેલેથી ટી20 ટીમમાં હતી અને હવે તેમને વનડે ટીમમાં પણ સ્થાન મળ્યું છે.

ભારત એ મહિલા ટીમ ઇંગ્લેન્ડ એ સામે પ્રથમ ત્રણ મેચોની ટી20 શ્રેણી રમશે, જેનો પ્રારંભ 20 જૂનથી થશે. ત્યારબાદ 1 જુલાઈથી ત્રણ મેચોની વનડે શ્રેણી શરૂ થશે. ટી20 ટીમની કમાન અનુષ્કા શર્મા સંભાળશે, જ્યારે વનડે ટીમનું નેતૃત્વ હરલીન દેઓલ કરશે. ટી20 ટીમમાં વૃંદા દિનેશ ઉપકપ્તાન રહેશે, જ્યારે વનડે ટીમમાં પ્રતિકા રાવતને ઉપકપ્તાન તરીકે જવાબદારી સોંપવામાં આવી છે.

આ ફેરફારો સાથે ભારત એ મહિલા ટીમ ઇંગ્લેન્ડ એ સામે સશક્ત પ્રદર્શન કરવાની આશા રાખી રહી છે.