દેશભરમાં ચોમાસું હવે સંપૂર્ણ જોરમાં છે. ભારતીય હવામાન વિભાગ (IMD)એ આગાહી કરી છે કે આગામી ચારથી પાંચ દિવસ સુધી દેશના અનેક ભાગોમાં ભારેથી અતિભારે વરસાદ ચાલુ રહેશે. ઉત્તર-પશ્ચિમ બંગાળની ખાડીમાં સર્જાયેલા મજબૂત લો-પ્રેશર સિસ્ટમના કારણે મધ્ય ભારત સહિત પશ્ચિમ અને ઉત્તર ભારતના વિસ્તારોમાં ચોમાસું વધુ સક્રિય બન્યું છે.

હવામાન વિભાગના જણાવ્યા મુજબ ગુજરાત, સૌરાષ્ટ્ર, કોંકણ, મધ્ય મહારાષ્ટ્ર, ઓડિશા અને પશ્ચિમ મધ્ય પ્રદેશમાં અલગ-અલગ સ્થળોએ અતિભારે વરસાદની શક્યતા છે. સાથે જ હરિયાણા, પંજાબ, રાજસ્થાનના બાકીના વિસ્તારો તેમજ ગુજરાતના કેટલાક ભાગોમાં આગામી ચાર દિવસમાં દક્ષિણ-પશ્ચિમ ચોમાસું આગળ વધે તેવી સંભાવના વ્યક્ત કરવામાં આવી છે.

મહારાષ્ટ્રમાં સતત વરસી રહેલા વરસાદે જનજીવનને અસર પહોંચાડી છે. ખાસ કરીને મુંબઈ અને આસપાસના વિસ્તારોમાં અનેક રસ્તાઓ પાણીમાં ગરકાવ થયા છે, ટ્રાફિક જામની સ્થિતિ સર્જાઈ છે અને લોકલ ટ્રેન સેવાઓ પણ પ્રભાવિત થઈ છે. IMD દ્વારા રેડ એલર્ટ જાહેર કરવામાં આવતા બૃહન્મુંબઈ મહાનગરપાલિકાએ (BMC) શાળાઓ અને કોલેજોમાં રજા જાહેર કરી છે.

ગુજરાતના જૂનાગઢ સહિતના વિસ્તારોમાં પણ ભારે વરસાદને કારણે પાણી ભરાવાની સમસ્યા સામે આવી છે. બીજી તરફ કેરળમાં નદીઓ અને ડેમોના જળસ્તરમાં સતત વધારો નોંધાતા પૂર, ભૂસ્ખલન અને દરિયાકાંઠાના ધોવાણ અંગે ચેતવણી આપવામાં આવી છે. ઓડિશા અને પશ્ચિમ બંગાળમાં પણ બંગાળની ખાડીમાં સક્રિય હવામાન પ્રણાલીને કારણે ભારે વરસાદ અને દરિયો તોફાની બનવાની આગાહી કરવામાં આવી છે.

હવામાન વિભાગે નાગરિકોને અનાવશ્યક મુસાફરી ટાળવા, નદી-નાળાઓ અને નીચાણવાળા વિસ્તારોમાં ખાસ સાવચેતી રાખવા તેમજ સ્થાનિક તંત્ર દ્વારા જારી કરવામાં આવતી સૂચનાઓનું પાલન કરવાની અપીલ કરી છે.