Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે આંતરરાષ્ટ્રીય સુરક્ષા અને વેપાર અંગે ખૂબ જ મહત્વપૂર્ણ જાહેરાત કરી છે. રાષ્ટ્રપતિ ટ્રમ્પના મતે, ઈરાન સંમત થયું છે કે તે હોર્મુઝ સ્ટ્રેટને ફરી ક્યારેય બંધ નહીં કરે.

ટ્રમ્પે સ્પષ્ટ કર્યું કે, આ મહત્વપૂર્ણ દરિયાઈ માર્ગનો ઉપયોગ હવે વિશ્વ વિરુદ્ધ હથિયાર તરીકે કરવામાં આવશે નહીં. આ કરારને વૈશ્વિક સ્તરે તેલ પુરવઠા અને દરિયાઈ વેપાર માર્ગોની સુરક્ષા માટે મોટી રાહત તરીકે જોવામાં આવી રહ્યો છે. રાષ્ટ્રપતિના આ નિવેદનથી વિશ્વ રાજકારણમાં નવી ચર્ચા શરૂ થઈ છે. કારણ કે, આ માર્ગ આંતરરાષ્ટ્રીય વેપાર માટે અત્યંત મહત્વપૂર્ણ છે.

ઉલ્લેખનીય છે કે, અગાઉ ઈરાને જાહેરાત કરી હતી કે, લેબનોનમાં યુદ્ધવિરામ બાદ, હોર્મુઝ સ્ટ્રેટ હવે વાણિજ્યિક જહાજો માટે સંપૂર્ણપણે ખુલ્લું છે. ઈરાનના વિદેશ પ્રધાન અરાઘચીએ માહિતી આપી હતી કે, લેબનોનમાં યુદ્ધવિરામને ધ્યાનમાં રાખીને સ્ટ્રેટને તમામ વાણિજ્યિક જહાજોની અવરજવર માટે સંપૂર્ણપણે ખોલવામાં આવ્યો છે. જો કે, તેમણે એ પણ સ્પષ્ટતા કરી હતી કે, હોર્મુઝ સ્ટ્રેટ હાલમાં યુદ્ધવિરામ સમયગાળાના બાકીના સમયગાળા માટે ખુલ્લું છે.

49 દિવસ પછી પ્રતિબંધ ઉઠાવી લેવામાં આવ્યો
નોંધનીય છે કે, 28 ફેબ્રુઆરી, 2026થી હોર્મુઝ સ્ટ્રેટમાંથી શિપિંગ ગંભીર રીતે ખોરવાઈ ગયું છે. આ દિવસે અમેરિકા અને ઇઝરાયલે સૌપ્રથમ ઘણા ઈરાની લક્ષ્યો પર હુમલો કર્યો હતો, જેના પછી ઈરાને માર્ગ સંપૂર્ણપણે બંધ કરી દીધો. આ મહત્વપૂર્ણ દરિયાઈ માર્ગ 28 ફેબ્રુઆરીથી 17 એપ્રિલ સુધી લગભગ 49 દિવસ પછી ફરી ખુલ્યો છે.

ડોનાલ્ડ ટ્રમ્પે પણ પુષ્ટિ આપી
અમેરિકાના રાષ્ટ્રપતિ ડોનાલ્ડ ટ્રમ્પે પણ તેમના સોશિયલ મીડિયા પ્લેટફોર્મ "ટ્રુથ સોશિયલ" પર આ વાતની પુષ્ટિ કરી હતી. તેમણે લખ્યું હતું કે, ઈરાને હોર્મુઝ સ્ટ્રેટને તમામ પ્રકારના જહાજો માટે સંપૂર્ણપણે ખોલવાની જાહેરાત કરી છે. નોંધનીય છે કે, અમેરિકાએ હોર્મુઝ સહિત અન્ય ઈરાની બંદરો પર પણ નાકાબંધીની જાહેરાત કરી હતી.