નવી દિલ્હી: જો તમે EPFO (કર્મચારી ભવિષ્ય નિધિ સંગઠન)માંથી PF ઉપાડવા માટે ક્લેમ કર્યો છે અથવા ક્લેમ કરવાની તૈયારીમાં છો, તો તમારે થોડી વધુ રાહ જોવી પડી શકે છે. EPFOએ પોતાના સિસ્ટમમાં મોટા પાયે ડેટાબેસ કન્સોલિડેશન અને સોફ્ટવેર અપગ્રેડ હાથ ધર્યું છે, જેના કારણે આગામી બે અઠવાડિયા સુધી ક્લેમ અને અન્ય ઓનલાઈન સેવાઓની પ્રક્રિયામાં વિલંબ થઈ શકે છે.

EPFOના જણાવ્યા મુજબ, અપગ્રેડ બાદ સભ્યો અને નોકરીદાતાઓ માટેની સેવાઓ ધીમે ધીમે ફરી શરૂ કરવામાં આવી રહી છે. જોકે સિસ્ટમ સંપૂર્ણપણે સ્થિર ન થાય ત્યાં સુધી તમામ ક્લેમ અને સર્વિસ રિક્વેસ્ટની વધારાની ચકાસણી કરવામાં આવશે. આ પ્રક્રિયાનો હેતુ સભ્યોના ડેટાની સુરક્ષા અને ક્લેમની ચોકસાઈ સુનિશ્ચિત કરવાનો છે.

વારંવાર ક્લેમ અથવા લોગિન ન કરવાની સલાહ
EPFOએ સભ્યોને સલાહ આપી છે કે જો તેમનો ક્લેમ પેન્ડિંગ હોય તો વારંવાર નવો ક્લેમ અથવા નવી રિક્વેસ્ટ સબમિટ ન કરે. ઉપરાંત, પીક અવર્સ દરમિયાન વારંવાર પોર્ટલમાં લોગિન કરવાનું પણ ટાળવું જોઈએ, કારણ કે તે સિસ્ટમ પર વધારાનો ભાર ઊભો કરી શકે છે.

UMANG એપ પર સેવાઓ હાલ બંધ
આ દરમિયાન UMANG એપ પર EPFOની કેટલીક સેવાઓ તાત્કાલિક ઉપલબ્ધ નથી. એપમાં દર્શાવવામાં આવેલી માહિતી મુજબ માઇગ્રેશનનું કામ પૂર્ણ થયા બાદ સેવાઓ ફરી શરૂ કરવામાં આવશે. ત્યાં સુધી સભ્યો EPFO Member Portal મારફતે જરૂરી કામગીરી કરી શકશે.

PF ક્લેમ કેવી રીતે કરવો?
PF ક્લેમ કરવા માટે EPFO Member Portal પર UAN અને પાસવર્ડથી લોગિન કરો. ત્યારબાદ Online Services વિભાગમાં જઈ Claim (Form-31, Form-19, Form-10C/10D) વિકલ્પ પસંદ કરો. બેંક વિગતો ચકાસી જરૂરી દસ્તાવેજો અપલોડ કરો અને OTP વેરિફિકેશન પૂર્ણ કરીને ક્લેમ સબમિટ કરો.

ગભરાવાની જરૂર નથી
EPFOએ સ્પષ્ટ કર્યું છે કે ક્લેમની પ્રક્રિયામાં થતો વિલંબ માત્ર સિસ્ટમ અપગ્રેડ અને ડેટા વેરિફિકેશનને કારણે છે. આગામી બે અઠવાડિયામાં સેવાઓ ફરી સામાન્ય ગતિએ કાર્યરત થઈ જશે તેવી આશા વ્યક્ત કરવામાં આવી છે.