અમદાવાદ: જાણીતા હવામાન નિષ્ણાત Ambalal Patelએ રાજ્યમાં ચોમાસા અને પ્રી-મોન્સૂન વરસાદને લઈને મહત્વપૂર્ણ આગાહી વ્યક્ત કરી છે. તેમના જણાવ્યા અનુસાર આજથી રાજ્યના હવામાનમાં નોંધપાત્ર પલટો જોવા મળશે અને 4 જૂન સુધી ગુજરાતના અનેક વિસ્તારોમાં વરસાદી માહોલ સર્જાઈ શકે છે.

અંબાલાલ પટેલના જણાવ્યા મુજબ હાલ ગુજરાત અને રાજસ્થાનના ઉપરના ભાગમાં એક સાયક્લોનિક સર્ક્યુલેશન સક્રિય છે. આ સિસ્ટમની અસર ધીમે-ધીમે ગુજરાતમાં જોવા મળશે, જેના કારણે આજથી 4 જૂન દરમિયાન રાજ્યના ઘણા વિસ્તારોમાં રોહિણી નક્ષત્રનો વરસાદ થવાની સંભાવના છે.

આ સમયગાળા દરમિયાન ગાજવીજ, વીજચમકારા અને સખત પવન સાથે વરસાદ વરસી શકે છે. ખાસ કરીને પંચમહાલ અને દાહોદ જિલ્લામાં અઢી ઇંચથી વધુ વરસાદ થવાની શક્યતા વ્યક્ત કરવામાં આવી છે. જ્યારે વડોદરા અને આસપાસના વિસ્તારોમાં એક ઇંચથી વધુ વરસાદ નોંધાઈ શકે છે.

ઉત્તર ગુજરાતમાં હિંમતનગર, સાબરકાંઠા અને અરવલ્લી સહિતના વિસ્તારોમાં વધુ વરસાદની સંભાવના છે, જ્યારે અન્ય વિસ્તારોમાં પણ હળવાથી મધ્યમ વરસાદ થઈ શકે છે. દક્ષિણ ગુજરાત તેમજ દક્ષિણ સૌરાષ્ટ્રના કેટલાક વિસ્તારોમાં પણ એક ઇંચથી વધુ વરસાદ થવાની શક્યતા વ્યક્ત કરવામાં આવી છે.

મહુવા, ભાવનગર, ગીર સોમનાથ અને દક્ષિણ સૌરાષ્ટ્રના અન્ય વિસ્તારોમાં આશરે એક ઇંચ જેટલો વરસાદ પડી શકે છે. અંબાલાલ પટેલે વધુમાં જણાવ્યું કે જો 8 અને 9 જૂન દરમિયાન ભારે વરસાદી સ્થિતિ સર્જાશે તો ત્યારબાદ અતિવૃષ્ટિ જેવી પરિસ્થિતિ પણ ઉભી થઈ શકે છે.

ચોમાસાને લઈને તેમણે આગાહી કરી છે કે ગુજરાતમાં આશરે 15 જૂન આસપાસ ચોમાસાનું આગમન થઈ શકે છે. જ્યારે 20 જૂન બાદ વરસાદની ગતિમાં વધારો થવાની સંભાવના છે. ઉપરાંત 23થી 28 જૂન દરમિયાન રાજ્યના મોટાભાગના વિસ્તારોમાં સારો અને વ્યાપક વરસાદ નોંધાઈ શકે છે.

હવામાન વિભાગની સત્તાવાર આગાહીઓ ઉપરાંત અંબાલાલ પટેલની આ આગાહી ખેડૂતો અને સામાન્ય નાગરિકોમાં ચર્ચાનો વિષય બની છે. જોકે, હવામાન સંબંધિત પરિસ્થિતિઓમાં સમયાંતરે ફેરફાર શક્ય હોવાથી સત્તાવાર સૂચનાઓ પર પણ નજર રાખવાની સલાહ આપવામાં આવી રહી છે.