Deepak Singla Arrested: એન્ફોર્સમેન્ટ ડિરેક્ટોરેટે (ED) મ આદમી પાર્ટીના(AAP) નેતા દીપક સિંગલાની ધરપકડ કરી છે. EDએ સોમવારે સવારે કથિત બેંક લોન છેતરપિંડી અને સંબંધિત મની લોન્ડરિંગ કેસના સંદર્ભમાં સિંગલાના અને અન્ય ઘણા વ્યક્તિઓ સાથે જોડાયેલા સ્થળો પર દરોડા પાડ્યા હતા.

સૂત્રોના જણાવ્યા અનુસાર, એજન્સી કથિત નાણાકીય અનિયમિતતાઓ અને શંકાસ્પદ બેંક લોન વ્યવહારોની તપાસ કરી રહી છે. જો કે, આ મામલે ED દ્વારા હજુ સુધી વિગતવાર સત્તાવાર નિવેદન જારી કરવામાં આવ્યું નથી.

તપાસ દરમિયાન અસંખ્ય દસ્તાવેજો, ડિજિટલ રેકોર્ડ અને નાણાકીય વ્યવહારો સંબંધિત મહત્વપૂર્ણ પુરાવાઓની તપાસ કરવામાં આવી રહી હોવાનું જાણવા મળે છે. દીપક સિંગલાએ હજુ સુધી આ બાબતે કોઈ ટિપ્પણી કરી નથી.

આ દરમિયાન AAP નેતા અને ગોવા પ્રભારી આતિશીએ દીપક સિંગલાના પરિસરમાં EDના દરોડા અંગે ટ્વિટર પર પોસ્ટ કરતા લખ્યું કે, "ગોવામાં AAPની વધતી જતી લોકપ્રિયતાને કારણે EDને ગોવા માટે ભાજપના સહ-પ્રભારી દીપક સિંગલાના નિવાસસ્થાને મોકલવામાં આવ્યું છે. આ માત્ર સ્વયંસેવકોને ડરાવવાનો જ નહીં પરંતુ ગોવા AAP સંગઠનમાંથી ડેટા જપ્ત કરવાનો પણ પ્રયાસ છે."

સિંગલા અગાઉ આમ આદમી પાર્ટી (AAP) તરફથી વિશ્વાસ નગર વિધાનસભા બેઠક પરથી ચૂંટણી લડી ચૂક્યા છે. 2024માં EDએ તપાસના ભાગ રૂપે તેમના પરિસરમાં દરોડા પાડ્યા હતા.
આ દરમિયાન EDએ એક અલગ કેસમાં પણ દરોડા પાડ્યા છે. આ કેસ આશરે ₹180 કરોડના કથિત રોકાણ કૌભાંડ સાથે સંબંધિત છે, જેમાં રોકાણના નામે લોકો સાથે છેતરપિંડી કરવામાં આવી હતી.

અધિકારીઓના જણાવ્યા અનુસાર, EDએ દિલ્હીના સુભાષ નગરમાં બાબાજી ફાઇનાન્સ ગ્રુપ સાથે સંકળાયેલા વ્યક્તિ રામ સિંહના પરિસરમાં પણ તપાસ કરી હતી. એજન્સી આ કેસમાં કથિત છેતરપિંડી અને મની ટ્રેલની તપાસ કરી રહી છે. સૂત્રો કહે છે કે, આગામી દિવસોમાં વધુ લોકોની પૂછપરછ કરવામાં આવી શકે છે અને તપાસનો વ્યાપ વધારવામાં આવી શકે છે.