અમદાવાદ સ્થાનિક સ્વરાજ્યની ચૂંટણીને લઈને રાજકીય માહોલ ગરમાયો છે. વિવિધ પક્ષો દ્વારા ઉમેદવારોની જાહેરાત થતા જ શહેરમાં ઉત્સાહ સાથે રાજકીય ચંચળતા પણ વધી છે. ટિકિટ કપાતા કેટલાક દાવેદારોમાં નારાજગી પણ જોવા મળી રહી છે, જ્યારે ઘણા વોર્ડમાં હજી ઉમેદવારોની જાહેરાત બાકી છે.

આ વચ્ચે, ટિકિટ જાહેર થાય તે પહેલાં જ શહેરના ખાનપુર સ્થિત ભાજપ કાર્યાલય ખાતે ચુસ્ત સુરક્ષા ગોઠવી દેવાઈ છે. કાર્યાલય પર આવતા દરેક વ્યક્તિનું ચેકિંગ કરવામાં આવી રહ્યું છે અને ઓળખપત્ર (ID) તપાસ્યા બાદ જ પ્રવેશ આપવામાં આવી રહ્યો છે.

પોલીસને સૂચના આપવામાં આવી છે કે માત્ર પરિચિત અને અધિકૃત વ્યક્તિઓને જ કાર્યાલયમાં પ્રવેશ આપવામાં આવે. સુરક્ષાના ભાગરૂપે દરેકની સઘન તપાસ બાદ જ અંદર જવાની મંજૂરી આપવામાં આવી રહી છે.

ઉલ્લેખનીય છે કે સામાન્ય રીતે કોંગ્રેસ કાર્યાલય પર સુરક્ષા ગોઠવાતી હોય છે, પરંતુ આ વખતે ભાજપ કાર્યાલય પર પણ સુરક્ષા વધારવામાં આવતા શહેરમાં ચર્ચાનો વિષય બન્યો છે.