રાજકોટ: શહેરમાં નકલી પોલીસ બની તોડબાજી કરનાર બે શખ્સનો ચોંકાવનારો બનાવ સામે આવ્યો છે. આ ઘટના આજી ડેમ વિસ્તાર પાસે બની હોવાનું જાણવા મળ્યું છે.

મળતી માહિતી મુજબ, બે વ્યક્તિ રસ્તા પરથી પસાર થતા વાહનોને અટકાવી પોતે પોલીસ હોવાનું જણાવી ચેકિંગના બહાને તોડબાજી કરતા હતા. દરમિયાન એક જાગૃત નાગરિકે તેમની પાસે ઓળખ માટે આઈકાર્ડ માંગતા બંને શખ્સ ગભરાઈ ગયા હતા.

નાગરિકે મોબાઈલમાં વીડિયો બનાવવાનું શરૂ કરતાં જ બંને પોતાની કારમાં બેસીને સ્થળ પરથી ફરાર થઈ ગયા હતા. આ વીડિયો સોશિયલ મીડિયા પર વાયરલ થતા મામલો પોલીસ સુધી પહોંચ્યો હતો.

પોલીસે બે અજાણ્યા શખ્સ સામે ગુનો નોંધ્યો છે અને તેમની શોધખોળ શરૂ કરી છે.