નવી દિલ્હી : દેશભરના લાખો મેડિકલ વિદ્યાર્થીઓ માટે સૌથી મોટા સમાચાર સામે આવ્યા છે. NEET-UG 2026 પરીક્ષાને લઈને ઉઠેલા પેપર લીક કાંડ બાદ કેન્દ્ર સરકાર અને નેશનલ ટેસ્ટિંગ એજન્સી (NTA)એ આખરે મોટો નિર્ણય લેતા પરીક્ષા રદ જાહેર કરી દીધી છે. આ નિર્ણય બાદ વિદ્યાર્થીઓ અને વાલીઓમાં ભારે રોષ, નિરાશા અને ચિંતાનો માહોલ જોવા મળી રહ્યો છે.

ઉલ્લેખનીય છે કે, ગત 3 મે 2026ના રોજ દેશભરના વિવિધ પરીક્ષા કેન્દ્રો પર NEET-UG પરીક્ષા યોજાઈ હતી. પરીક્ષા પૂર્ણ થયા બાદ સોશિયલ મીડિયા સહિત અનેક માધ્યમોમાં પેપર લીક થયાની ચર્ચાઓ તેજ બની હતી. શરૂઆતમાં સમગ્ર મામલાને નકારવામાં આવ્યો હતો, પરંતુ બાદમાં સામે આવેલા પુરાવાઓ અને ફરિયાદોને ધ્યાનમાં રાખીને સરકારે આખરે કડક નિર્ણય લેવો પડ્યો છે.

આ સમગ્ર પેપર લીક કાંડ હવે દેશની સૌથી મોટી તપાસ એજન્સી CBIને સોંપવામાં આવ્યો છે. CBI દ્વારા FIR નોંધવાની કાર્યવાહી શરૂ કરવામાં આવી છે અને વિવિધ રાજ્યોમાં ફેલાયેલા પેપર લીક માફિયાઓના નેટવર્ક સુધી પહોંચવા માટે વિશેષ તપાસ હાથ ધરાશે. તપાસમાં અનેક મોટા ખુલાસા થવાની શક્યતા વ્યક્ત કરવામાં આવી રહી છે.

પરીક્ષા રદ થતાં હવે લાખો વિદ્યાર્થીઓની મહિનાઓની મહેનત પર પાણી ફરી વળ્યું છે. નવી પરીક્ષાની તારીખ ક્યારે જાહેર થશે? પ્રવેશ પ્રક્રિયામાં કેટલો વિલંબ થશે? તેવા અનેક સવાલો વિદ્યાર્થીઓ અને વાલીઓને સતાવી રહ્યા છે. સોશિયલ મીડિયા પર પણ વિદ્યાર્થીઓમાં ભારે રોષ જોવા મળી રહ્યો છે અને પારદર્શક પરીક્ષા પ્રણાલીની માંગ ઉઠી રહી છે.

હવે સમગ્ર દેશની નજર CBIની તપાસ અને NTAની આગામી જાહેરાત પર ટકેલી છે.