દિસપુર: અસમની રાજનીતિમાં મંગળવારનો દિવસ ઐતિહાસિક બની ગયો, જ્યારે હિમંત બિસ્વા સરમાએ સતત બીજી વખત મુખ્યમંત્રી પદની શપથ લીધી. આ સાથે તેઓ અસમમાં સતત બે કાર્યકાળ સુધી મુખ્યમંત્રી બનનાર પ્રથમ બિન-કોંગ્રેસી નેતા બન્યા છે.

ગૌહાટીમાં આયોજિત ભવ્ય શપથવિધિ સમારંભમાં રાજ્યપાલ લક્ષ્મણ પ્રસાદ આચાર્યએ તેમને પદ અને ગોપનીયતાની શપથ અપાવી હતી. રવિવારે એનડીએ વિધાનમંડળ પક્ષના નેતા તરીકે પસંદગી થયા બાદ રાજ્યપાલે તેમને મુખ્યમંત્રી તરીકે નિયુક્ત કર્યા હતા.

અસમમાં એનડીએ સરકારનો આ સતત ત્રીજો કાર્યકાળ છે. અગાઉ 2016માં ભાજપના નેતૃત્વ હેઠળ પ્રથમ વખત સર્વાનંદ સોનોવાલ મુખ્યમંત્રી બન્યા હતા, જ્યારે 2021માં હિમંત બિસ્વા સરમાએ રાજ્યની કમાન સંભાળી હતી.

શપથવિધિ સમારંભને ખાસ બનાવતા તેમાં વડાપ્રધાન Narendra Modi, કેન્દ્રીય ગૃહમંત્રી Amit Shah, રક્ષામંત્રી Rajnath Singh, નાણામંત્રી Nirmala Sitharaman સહિત અનેક કેન્દ્રીય નેતાઓ અને એનડીએ શાસિત રાજ્યોના મુખ્યમંત્રીઓ હાજર રહ્યા હતા.

હિમંત બિસ્વા સરમાનો રાજકીય સફર પણ ખૂબ રસપ્રદ રહ્યો છે. વર્ષ 2015માં તેમણે કોંગ્રેસ છોડી ભાજપમાં જોડાયા હતા. તે સમયે અસમમાં કોંગ્રેસનું પ્રભુત્વ હતું અને ભાજપ પાસે માત્ર પાંચ ધારાસભ્યો હતા. જોકે, હિમંત સરમાએ વ્યૂહાત્મક રીતે ભાજપને ઉત્તર-પૂર્વ ભારતમાં મજબૂત બનાવવામાં મહત્વની ભૂમિકા ભજવી હતી.

શિક્ષણની વાત કરીએ તો હિમંત બિસ્વા સરમાએ ગૌહાટીમાં જ અભ્યાસ પૂર્ણ કર્યો હતો. તેમણે કોટન કોલેજમાંથી રાજનીતિશાસ્ત્રમાં બી.એ. અને એમ.એ.ની ડિગ્રી મેળવી હતી, ત્યારબાદ ગવર્નમેન્ટ લૉ કોલેજમાંથી એલએલબી પૂર્ણ કરી થોડો સમય ગૌહાટી હાઈકોર્ટમાં વકીલાત પણ કરી હતી.

તેમનો રાજકીય કારકિર્દી વિદ્યાર્થી રાજકારણથી શરૂ થયો હતો. 1991-92 દરમિયાન તેઓ કોટન કોલેજ વિદ્યાર્થી સંઘના મહાસચિવ રહ્યા હતા અને બાદમાં ઓલ અસમ સ્ટુડન્ટ્સ યુનિયન (AASU) સાથે જોડાયા હતા. વર્ષ 2001માં તેઓ પ્રથમ વખત જાલુકબારી બેઠક પરથી ધારાસભ્ય તરીકે ચૂંટાયા હતા અને ત્યારથી સતત જીતતા આવ્યા છે.