સુરત રેલ્વે સ્ટેશન પર આજે એક ચમત્કારિક અને હૃદયદ્રાવક ઘટના સામે આવી છે, જેમાં મોતના મુખમાં પહોંચેલો એક મુસાફર અજોડ રીતે બચી ગયો હતો. આ સમગ્ર ઘટના સ્ટેશન પર લગાવવામાં આવેલા સીસીટીવી કેમેરામાં કેદ થઈ છે.

માહિતી મુજબ,  અઝમેર  સ્પેશીયલ ટ્રેન  નંબર 1 પરથી રવાના થઈ રહી હતી. તે દરમિયાન એક મુસાફરે દોડીને ટ્રેન પકડવાનો પ્રયાસ કર્યો, પરંતુ સંતુલન ગુમાવતા તે પ્લેટફોર્મ અને ટ્રેન વચ્ચેના ગેપમાં ખાબક્યો. આશરે અડધી મિનિટ સુધી ટ્રેન તેની ઉપરથી પસાર થતી રહી, જેને જોઈને ત્યાં હાજર મુસાફરોમાં ભારે અફરાતફરી મચી ગઈ.

આ ઘટનાને નજરે જોઈ રહેલી સુરત રેલવે પોલીસની સર્વેલન્સ ટીમે તાત્કાલિક સ્ફૂર્તિ દાખવી. રેલવે જવાનોએ તરત જ ટ્રેન રોકાવવાની કાર્યવાહી કરી અને ટ્રેન નીચે ફસાયેલા યુવકને અત્યંત સાવધાનીપૂર્વક બહાર કાઢ્યો.

ચમત્કારિક રીતે બચી ગયેલા યુવકને બહાર કાઢ્યા બાદ તે ખૂબ ગભરાયેલો હતો. સ્થળ પર હાજર પોલીસે તેને સમજાવીને શાંત કર્યો અને પછી તેને અન્ય ટ્રેનમાં સુરક્ષિત રીતે બેસાડીને રવાના કર્યો.

આ સમગ્ર ઘટના જોતા પ્લેટફોર્મ પર હાજર લોકો એક ક્ષણ માટે સ્તબ્ધ થઈ ગયા હતા. આ બનાવ ફરી એકવાર દોડતી ટ્રેન પકડવાની જોખમી ટેવ સામે ચેતવણીરૂપ બની રહ્યો છે.