ગુજરાત: દીકરીઓને સર્વાઇકલ કેન્સરથી સુરક્ષિત બનાવવા માટે શરૂ કરાયેલા HPV રસીકરણ અભિયાનને નોંધપાત્ર સફળતા મળી રહી છે. રાજ્યમાં અત્યાર સુધીમાં 5 લાખથી વધુ દીકરીઓને HPV રસીનો પ્રથમ ડોઝ આપવામાં આવ્યો છે. રાજ્ય સરકારે નિર્ધારિત લક્ષ્યાંકમાંથી 90 ટકા લક્ષ્યાંક પૂર્ણ કર્યો હોવાનું આરોગ્ય મંત્રી Rushikesh Patelએ જણાવ્યું હતું.

આરોગ્ય મંત્રીએ જણાવ્યું કે Bhupendra Patelના માર્ગદર્શન હેઠળ શરૂ કરાયેલું આ અભિયાન રાજ્યભરમાં અસરકારક રીતે ચાલી રહ્યું છે. ખાસ વાત એ છે કે અત્યાર સુધીમાં રસીકરણ બાદ ગંભીર આડઅસરનો એકપણ કિસ્સો નોંધાયો નથી, જે આ રસી સંપૂર્ણ સુરક્ષિત હોવાનું દર્શાવે છે.

રાજ્યની તમામ મેડિકલ કોલેજ સંલગ્ન હોસ્પિટલો, જિલ્લા હોસ્પિટલો, સબ-ડિસ્ટ્રિક્ટ હોસ્પિટલો તેમજ CHC, PHC અને UPHC કેન્દ્રો પર 14 વર્ષની દીકરીઓ માટે મફતમાં HPV રસી ઉપલબ્ધ કરાવવામાં આવી છે.

આરોગ્ય મંત્રીશ્રીએ રાજ્યના માતા-પિતાને અપીલ કરતા જણાવ્યું કે, મે મહિનાના અંત સુધી ચાલનારા આ અભિયાનનો લાભ લેવાનો બાકી હોય તેવી તમામ 14 વર્ષની દીકરીઓને નજીકના સરકારી આરોગ્ય કેન્દ્ર પર લઈ જઈ રસી અપાવવી જોઈએ.

તેમણે સોશિયલ મીડિયા પર ફેલાતી ભ્રામક અને વૈજ્ઞાનિક આધાર વગરની અફવાઓથી દૂર રહેવા પણ અનુરોધ કર્યો હતો. દીકરીઓના સુરક્ષિત અને સ્વસ્થ ભવિષ્ય માટે આ અભિયાનમાં સહભાગી બનવા તેમણે લોકોને અપીલ કરી હતી.