નવી દિલ્હી: Government of Indiaએ માતા અને નવજાત શિશુના આરોગ્ય સેવાઓને વધુ મજબૂત બનાવવા માટે ‘જનની’ નામનું QR આધારિત ડિજિટલ હેલ્થ પ્લેટફોર્મ લોન્ચ કર્યું છે. સરકારના જણાવ્યા અનુસાર, આ પ્લેટફોર્મ ગર્ભાવસ્થા પહેલા થી લઈને પ્રસૂતિ અને નવજાત શિશુની સંભાળ સુધીની સમગ્ર આરોગ્ય સેવાઓનું ડિજિટલ ટ્રેકિંગ અને મોનીટરીંગ કરશે.

સરકાર દ્વારા જાહેર કરવામાં આવેલા નિવેદન મુજબ ‘જનની’ પ્લેટફોર્મ મહિલાઓના પ્રજનન સમયગાળા દરમિયાનના તમામ આરોગ્ય રેકોર્ડને ડિજિટલ રીતે સુરક્ષિત અને વ્યવસ્થિત રીતે સંગ્રહિત કરશે. તેમાં ગર્ભાવસ્થા પૂર્વ તપાસ, પ્રસૂતિની તૈયારી, ડિલિવરી, પ્રસૂતિ બાદની સંભાળ, નવજાત શિશુની દેખરેખ, નાના બાળકોની ઘરઆધારિત સંભાળ તેમજ પરિવાર નિયોજન જેવી સેવાઓનો સમાવેશ કરવામાં આવ્યો છે.

નવી સિસ્ટમ હાલના RCH પોર્ટલના અપગ્રેડેડ વર્ઝન તરીકે તૈયાર કરવામાં આવી છે. આ પ્લેટફોર્મ લાંબા ગાળાનો હેલ્થ રેકોર્ડ તૈયાર કરશે, જેથી માતા અને બાળકના આરોગ્યની સતત દેખરેખ રાખી શકાશે અને સમયસર સારવાર અથવા જરૂરી હસ્તક્ષેપ કરી શકાશે.

‘જનની’ પ્લેટફોર્મની સૌથી ખાસ વિશેષતા QR આધારિત ડિજિટલ માતા અને શિશુ આરોગ્ય કાર્ડ છે. આ કાર્ડ દ્વારા આરોગ્ય સંબંધિત માહિતી દેશના કોઈપણ ખૂણે સરળતાથી ઉપલબ્ધ થઈ શકશે.

સરકારના જણાવ્યા પ્રમાણે, પ્લેટફોર્મમાં હાઈ-રિસ્ક પ્રેગ્નન્સી માટે ઓટોમેટિક એલર્ટ, રિયલ-ટાઈમ ડેશબોર્ડ અને જરૂરી કેસોની યાદી જેવી સુવિધાઓ પણ આપવામાં આવી છે. જેથી આરોગ્ય કર્મચારીઓને સમયસર પગલાં ભરવામાં સરળતા રહેશે.

આ ઉપરાંત ‘જનની’ને U-WIN અને પોષણ જેવા રાષ્ટ્રીય પ્લેટફોર્મ સાથે પણ જોડવામાં આવ્યું છે, જેથી અલગ અલગ યોજનાઓ વચ્ચે ડેટા શેરિંગ અને લાભાર્થીઓની ટ્રેકિંગ વધુ અસરકારક બની શકે.

પ્લેટફોર્મમાં ABHA, આધાર (OTP અને બાયોમેટ્રિક) અને મોબાઈલ નંબર દ્વારા લાભાર્થીઓનું રજીસ્ટ્રેશન કરી શકાશે. સાથે જ સમગ્ર દેશમાં રેકોર્ડ શોધવાની સુવિધા પણ ઉપલબ્ધ રહેશે.

સરકારે જણાવ્યું કે અત્યાર સુધીમાં ‘જનની’ પ્લેટફોર્મ પર 1.34 કરોડથી વધુ લાભાર્થીઓનું રજીસ્ટ્રેશન થઈ ચૂક્યું છે. જ્યારે 30 લાખથી વધુ ગર્ભવતી મહિલાઓનું નોંધણીકરણ, 30 લાખથી વધુ માતા-શિશુ આરોગ્ય કાર્ડ જારી અને 1 લાખથી વધુ બાયોમેટ્રિક વેરિફિકેશન કરવામાં આવ્યા છે.

સરકારના જણાવ્યા મુજબ, આ પ્લેટફોર્મ દ્વારા ગર્ભાવસ્થા તપાસ, રસીકરણ, જરૂરી આરોગ્ય એલર્ટ, નજીકના આરોગ્ય કેન્દ્રોની માહિતી તેમજ પોષણ અને આરોગ્ય માર્ગદર્શન પણ સરળતાથી ઉપલબ્ધ બનશે.