અમદાવાદ સરદાર વલ્લભભાઈ પટેલ ઇન્ટરનેશનલ એરપોર્ટ પર કસ્ટમ્સની એર ઈન્ટેલિજન્સ યુનિટે એક વિશેષ કાર્યવાહી દરમિયાન એક મહિલા પાસેથી આશરે 553.07 ગ્રામ સોનું ઝડપ્યું છે, જેને બજારમાં 83 લાખથી વધુ રૂપિયાની કિંમત હોવાનું જણાયું છે. આ ઘટનાથી સુરક્ષા અને કસ્ટમ્સ તંત્ર સક્રિય બન્યું છે.

આ કાર્યવાહી એડવાન્સ પેસેન્જર ઇન્ફોર્મેશન સિસ્ટમ (APIS) દ્વારા પ્રાપ્ત ડેટા એનાલિસિસ અને પ્રોફાઇલિંગના આધારે કરવામાં આવી હતી. વિગતો મુજબ, 30 તારીખે મહિલા કુઆલાલમ્પુરથી અમદાવાદ આવી હતી. તેના હાલચાલ અને વર્તન પર શંકા જતા કસ્ટમ્સ અને પોલીસ તંત્રએ તેની પુછપરછ શરૂ કરી. અનુમાનિત જવાબ ન આપતાં તેની તપાસ વધુ કડક કરવામાં આવી, ત્યારબાદ તેની પાસેથી સોનું જપ્ત કરાયું.

મેડિકલ તપાસ દરમિયાન ચોંકાવનારી વિગતો સામે આવી. મહિલાએ પોતાની આંતરિક કેપ્સ્યુલ્સમાં લિક્વિડ કેમિકલ સાથે મિશ્રિત ગોલ્ડ પેસ્ટ છુપાવી રાખી હતી. કસ્ટમ્સ વિભાગ દ્વારા આ પેસ્ટને રિફાઇન કર્યા બાદ 24 કેરેટનું કુલ 553.07 ગ્રામ સોનું મેળવવામાં આવ્યું. નોંધનીય છે કે જપ્ત કરાયેલા સોનાની બજાર કિંમત 83,29,234 રૂપિયા અને ટેરિફ કિંમત 75,58,393 રૂપિયા હોવાનું કસ્ટમ્સ દ્વારા જણાવ્યું છે.

પોલીસ અને કસ્ટમ્સ તંત્ર આ બાબતમાં વધુ તપાસ હાથ ધરવા માટે સક્રિય છે. તપાસ હેઠળ એ જાણવા પ્રયત્ન ચાલી રહ્યો છે કે, આ સોનું કોનું છે અને તેને અમદાવાદમાં કયા પ્રાપ્તિસ્થળે પહોંચાડવાનો હતો. આ ઘટનાથી કસ્ટમ્સ અને એરપોર્ટ સુરક્ષા તંત્રની સચેતતા અને આંતરરાષ્ટ્રીય તસ્કરી અટકાવવા માટેના પ્રયાસો સામે પ્રકાશ પડ્યો છે.

ઉલ્લેખનીય છે કે, આવી રીતે આંતરરાષ્ટ્રીય ઉડાન મારફતે સોનું છુપાવી લાવવામાં આવતું રહે છે, અને કસ્ટમ્સ તંત્ર એડવાન્સ માહિતી અને પ્રોફાઇલિંગના આધારે સમયસર કાર્યવાહી કરીને આ પ્રકારની તસ્કરીને અટકાવવા પ્રયાસ કરી રહ્યું છે.