‘Gen Z એટલે રાષ્ટ્ર પ્રથમ’, વિકસિત વાઇબ્રન્ટ વિલેજ કાર્યક્રમમાં યુવાનોએ PM મોદીને સંભળાવ્યા સરહદી ગામોના અનુભવો

વડાપ્રધાન નરેન્દ્ર મોદીએ રવિવારે વીડિયો કોન્ફરન્સિંગ દ્વારા ‘વિકસિત વાઇબ્રન્ટ વિલેજ પ્રોગ્રામ 2026’ના સહભાગીઓ સાથે સંવાદ કર્યો હતો. આ દરમિયાન ‘માય ભારત’ના સ્વયંસેવકોએ સરહદી ગામોની મુલાકાત દરમિયાન મેળવેલા અનુભવો વડાપ્રધાન સાથે શેર કર્યા અને વિકસિત ભારતના નિર્માણમાં યુવાનોની ભૂમિકા અંગે પોતાના વિચારો રજૂ કર્યા.

કાર્યક્રમ દરમિયાન દિવ્યાંશુ જોશીએ વડાપ્રધાનને જણાવ્યું કે તમામ ‘માય ભારત’ સ્વયંસેવકો વતી તેઓ વિશ્વાસ અપાવે છે કે Gen Z વિકસિત ભારતના સપનાને સાકાર કરવા માટે સંપૂર્ણપણે સમર્પિત રહેશે. તેમણે કહ્યું કે તેમના માટે Gen Z માત્ર એક પેઢીનું નામ નથી, પરંતુ રાષ્ટ્રનિર્માણ, ચારિત્ર્ય નિર્માણ, સેવા અને નવાચારનું પ્રતીક છે. એટલે કે Gen Zનો અર્થ ‘રાષ્ટ્ર પ્રથમ’ છે.

દિવ્યાંશુએ જણાવ્યું કે સરહદી ગામોની મુલાકાત દરમિયાન યુવાનોએ પોતાના અનુભવોનું દસ્તાવેજીકરણ કર્યું હતું અને તેને ડાયરીમાં નોંધ્યા હતા. હવે આ તમામ અનુભવોને એક વિસ્તૃત અહેવાલના રૂપમાં સંકલિત કરીને ટૂંક સમયમાં વડાપ્રધાન સાથે શેર કરવામાં આવશે.

આ દરમિયાન LLBની વિદ્યાર્થીની નિકિતાએ પણ સરહદી હિમાલયી વિસ્તારોની પોતાની મુલાકાતનો અનુભવ શેર કર્યો. તેમણે કહ્યું કે એક યુવતી તરીકે દુર્ગમ પહાડી વિસ્તારોની મુલાકાત તેમના માટે પડકારજનક હતી, પરંતુ સ્થાનિક લોકોએ તેમનું પરિવારના સભ્યની જેમ સ્વાગત કર્યું.

નિકિતાએ જણાવ્યું કે ધાર ગામની મુલાકાત દરમિયાન તેમણે મહિલા સરપંચ, ચૂંટાયેલા પ્રતિનિધિઓ, મહિલા ખેડૂતો, વડીલો અને બાળકો સાથે મુલાકાત કરી. વડાપ્રધાન મોદીએ યુવાનોના અનુભવોની પ્રશંસા કરતાં કહ્યું કે વિકસિત ભારતના નિર્માણમાં યુવાનોની સક્રિય ભાગીદારી મહત્વપૂર્ણ છે.