અમદાવાદ: શહેરની ઓળખ સમાન અને સાબરમતી નદી પર આવેલા મહત્વના Subhash Bridgeને તોડીને નવો આધુનિક બ્રિજ બનાવવાની કામગીરી હવે પૂરજોશમાં શરૂ થઈ ગઈ છે. વર્ષો જૂના અને જર્જરિત બનેલા આ બ્રિજને હટાવી આશરે ₹325 કરોડના ખર્ચે નવો બ્રિજ નિર્માણ કરવામાં આવશે. AMC દ્વારા હાલ બ્રિજના સુપર સ્ટ્રક્ચરને તોડવા ભારે મશીનરી તૈનાત કરવામાં આવી છે.

માહિતી અનુસાર બ્રિજની બંને તરફની પેરાફિટ પહેલેથી જ તોડી પાડવામાં આવી છે. હવે હાઈડ્રોલિક જેક અને વિશાળ ક્રેનની મદદથી બ્રિજના મુખ્ય માળખાને હટાવવાની કામગીરી હાથ ધરાઈ છે. આ માટે સાબરમતી નદીના પટમાં ખાસ રસ્તો બનાવી મશીનરી ઉતારવામાં આવી છે, જેથી તોડકામ ઝડપથી અને સુરક્ષિત રીતે થઈ શકે.

બ્રિજના નવનિર્માણના માર્ગમાં આવતા ધાર્મિક સ્થળો તેમજ કાચા-પાકા દબાણોને પણ વહીવટી તંત્ર દ્વારા દૂર કરવામાં આવ્યા છે. સમજાવટ અને કાયદેસરની કાર્યવાહી બાદ આ તમામ અવરોધોને હટાવી પ્રોજેક્ટ માટે માર્ગ મોકળો કરવામાં આવ્યો છે.

AMCના આ મહત્ત્વાકાંક્ષી પ્રોજેક્ટ અંતર્ગત હાલના જૂના બ્રિજની જગ્યાએ ફોર-લેન અથવા સિક્સ-લેનનો આધુનિક બ્રિજ બનાવવામાં આવશે. નવો બ્રિજ વધુ મજબૂત, આધુનિક ડિઝાઇનવાળો અને ટ્રાફિકની વધતી જરૂરિયાતોને ધ્યાનમાં રાખીને તૈયાર કરવામાં આવશે. સાથે જ આ બ્રિજ સાબરમતી રિવરફ્રન્ટની સુંદરતામાં પણ વધારો કરશે.

બીજી તરફ સુભાષ બ્રિજ બંધ થતા શહેરના RTO સર્કલ અને સાબરમતી વિસ્તારમાં ટ્રાફિકનું ભારણ વધી ગયું છે. પોલીસ તંત્ર દ્વારા વાહનચાલકોને વિકલ્પ રૂપે દધિચી બ્રિજનો ઉપયોગ કરવાની અપીલ કરવામાં આવી છે. લાંબા સમય સુધી ચાલનારી આ કામગીરી દરમિયાન નાગરિકોને ટ્રાફિક નિયમોનું પાલન કરવા અને ધૈર્ય રાખવા સૂચના આપવામાં આવી છે.