કોલકાતા : પશ્ચિમ બંગાળમાં દોઢ દાયકાથી ચાલી આવતા મમતા બેનર્જીના શાસનનો અંત આવ્યો છે. ભાજપે આસામ અને પુડુચેરી બાદ હવે બંગાળના ગઢ પર કેસરીયો લહેરાવી દીધો છે. ૨૦૨૧ની ભૂલોમાંથી બોધપાઠ લઈ અમિત શાહે આ વખતે એવી રણનીતિ ઘડી કે ટીએમસીનો ‘ખેલા હોબે’નો નારો ભાજપના ‘મેન-ટુ-મેન માર્કિંગ’ સામે ફિક્કો પડી ગયો.

ચાણક્યની ચાલ: ૧૫ દિવસ કેમ્પ અને બૂથનું સર્જરી જેવું એનાલિસિસ
અમિત શાહે ચૂંટણીના ૧૫ દિવસ પહેલા કોલકાતામાં ધામા નાખ્યા હતા. તેમણે માત્ર રેલીઓ જ ન કરી, પણ મોડી રાત સુધી બેઠકો કરીને દરેક બૂથનું ત્રણ કેટેગરીમાં એનાલિસિસ કર્યું:

નબળા અને મધ્યમ બૂથ: જ્યાં ૨૦૨૧માં હારનો તફાવત ઓછો હતો, ત્યાં ભાજપે આ વખતે શક્તિ બમણી કરી દીધી.

પેજ પ્રમુખ મોડેલ: યુપીનું સફળ મોડેલ બંગાળમાં ઉતાર્યું. એક કાર્યકરને ૩૦-૬૦ મતદારોની જવાબદારી સોંપાઈ, જેનું કામ મતદારોને ઘરેથી બૂથ સુધી ખેંચી લાવવાનું હતું.

લોકલ લીડરશીપ: બંગાળી નેતાઓને ફ્રન્ટ પર રાખ્યા અને પીએમ મોદીએ જાહેરાત કરી કે મુખ્યમંત્રી બંગાળની માટીનો જ હશે.

જૂના કાર્યકરો પર ભરોસો: ટીએમસીમાંથી આવેલા પક્ષપલટુઓને બદલે પાયાના કાર્યકરોને ટિકિટ આપી આંતરિક વિખવાદ ખતમ કર્યો.

ફિશ રાજનીતિ: અનુરાગ ઠાકુર અને મનોજ તિવારી જેવા નેતાઓએ જાહેરમાં માછલી ખાઈને સંદેશ આપ્યો કે ભાજપનું હિન્દુત્વ ‘શાક્ત પરંપરા’ (શક્તિ પૂજા)ને વરેલું છે, જેમાં માછલી પ્રસાદ છે.

મહિલા મતોમાં ગાબડું: ‘લક્ષ્મીર ભંડાર’ સામે ૩ હજારની ઓફર
મમતા બેનર્જીના મજબૂત વોટબેંક ગણાતી મહિલાઓને તોડવા ભાજપે માસ્ટરસ્ટ્રોક માર્યો:

ડબલ ધમાકા: મમતાના ૧૫૦૦ રૂપિયા સામે ભાજપે ૩ હજાર રૂપિયા અને સરકારી બસોમાં મફત મુસાફરીનું વચન આપ્યું.

સુરક્ષાનો મુદ્દો: સંદેશખાલી અને આરજી કર જેવી ઘટનાઓને ‘આઝાદી વિરુદ્ધ પ્રતિબંધ’ની લડાઈ બનાવી દીધી. રેખા પાત્રા અને પીડિતાની માતાને ટિકિટ આપીને ભાજપે સેન્ટીમેન્ટ જીતી લીધા.

૯૧ લાખ વોટ કપાયા: ‘ક્લીનિંગ ઓપરેશન’ ભાજપને ફળ્યું
ચૂંટણી પહેલાના સ્પેશિયલ ઇન્ટેન્સિવ રિવિઝન (SIR)માં ૯૧ લાખ શંકાસ્પદ મતદારોના નામ કમી થયા. જેમાંથી મોટાભાગના ટીએમસીના ગઢ ગણાતા મુસ્લિમ બહુમતી વિસ્તારો (મુર્શિદાબાદ, માલદા) માંથી હતા. ભાજપે તેને ‘ઘૂસણખોરોનું શુદ્ધિકરણ’ ગણાવીને હિન્દુ મતોનું ધ્રુવીકરણ કરવામાં સફળતા મેળવી.