ખેડા: ખેડા જિલ્લામાં જિલ્લા પંચાયત, નડિયાદ તાલુકા પંચાયત અને મહુધા તાલુકા પંચાયત માટે ભાજપે પોતાની દાવેદારી મજબૂત બનાવી છે. મહેસૂલ રાજ્યમંત્રી સંજયસિંહ મહીડાની આગેવાનીમાં ભવ્ય રોડ શો યોજાયો હતો, જેમાં મોટી સંખ્યામાં કાર્યકરો અને સમર્થકો જોડાયા હતા.

રોડ શો બાદ તમામ ઉમેદવારો મરીડા સ્થિત મેલડી માતાના મંદિરે પહોંચ્યા હતા, જ્યાં દર્શન કરીને આશીર્વાદ મેળવ્યા બાદ તેઓ જિલ્લા પંચાયત અને તાલુકા પંચાયત માટે ઉમેદવારી ફોર્મ ભરવા નીકળ્યા હતા. નડિયાદ જિલ્લા પંચાયત અને નડિયાદ તાલુકા પંચાયત માટે કુલ 42 ઉમેદવારો ફોર્મ ભરવા પહોંચ્યા હતા. આજે ઉમેદવારી ફોર્મ ભરવાનો છેલ્લો દિવસ હોવાથી તમામ ઉમેદવારોએ પોતાની ઉમેદવારી નોંધાવી છે.

આ પ્રસંગે સંજયસિંહ મહીડાએ ભાજપની જીતનો વિશ્વાસ વ્યક્ત કરતા જણાવ્યું હતું કે મહુધા તાલુકા પંચાયત, નડિયાદ તાલુકા પંચાયત અને જિલ્લા પંચાયતની તમામ બેઠકો પર ભાજપના ઉમેદવારોને વિજયી બનાવવામાં આવશે. તેમણે વધુમાં કહ્યું કે આ વિસ્તારમાં ભાજપનો ભગવો લહેરાવાશે.

મંત્રીએ જણાવ્યું હતું કે ભારતીય જનતા પાર્ટીના કાર્યકરો શિયાળો, ઉનાળો કે ચોમાસું—કોઈપણ ઋતુની પરવા કર્યા વગર સતત કાર્યરત રહે છે. આવનારા સમયમાં તાલુકા અને જિલ્લા પંચાયતોમાં ભાજપનું શાસન સ્થાપિત કરવાની દિશામાં કામ કરવામાં આવશે.

તેમણે વડાપ્રધાન નરેન્દ્ર મોદી અને મુખ્યમંત્રી ભુપેન્દ્ર પટેલના નેતૃત્વ હેઠળ રાજ્ય અને કેન્દ્ર સરકાર દ્વારા અમલમાં મૂકાયેલી વિવિધ યોજનાઓ—જેમ કે મા અમૃતમ કાર્ડ અને વૃદ્ધ સહાય યોજના—જનતા સુધી પહોંચાડવાની પ્રતિબદ્ધતા પણ વ્યક્ત કરી હતી.