કોટા: રાજસ્થાનના કોટામાં રવિવાર વહેલી સવારે દિલ્હી જતી રાજધાની એક્સપ્રેસના એક એસી કોચમાં ભયંકર આગ લાગી હતી. સત્તાવાળાઓએ માહિતી આપી છે કે આ ઘટનામાં કોઈને ઈજા થઈ નથી અને તમામ મુસાફરો સુરક્ષિત છે.

આ આગ તિરુવનંતપુરમથી નવી દિલ્હી જઈ રહેલી રાજધાની એક્સપ્રેસની B-1 કોચમાં સવારે લગભગ 5:15 વાગ્યે વિક્રમગઢ આલોટ રેલવે સ્ટેશન નજીક લાગી હતી. આ કોચમાં કુલ 68 મુસાફરો સવાર હતા.

રેલવે સુરક્ષા દળ (RPF) અને રેલવે સ્ટાફે તાત્કાલિક કાર્યવાહી કરીને માત્ર 15 મિનિટમાં સમગ્ર કોચ ખાલી કરાવ્યો હતો. સલામતીના ભાગરૂપે નજીકના અન્ય કોચોને પણ ખાલી કરાવવામાં આવ્યા હતા.

ઘટનાની જાણ થતાં જ કોટા રેલવે ડિવિઝનની રાહત અને બચાવ ટીમો સ્થળ પર પહોંચી ગઈ હતી. આગ લાગ્યા બાદ અસરગ્રસ્ત કોચને તરત જ ટ્રેનથી અલગ કરવામાં આવ્યો હતો અને ઓવરહેડ ઇલેક્ટ્રિક સપ્લાય (OHE) પણ બંધ કરી દેવામાં આવ્યો હતો.

કોટા ડિવિઝનના ડિવિઝનલ રેલવે મેનેજર (DRM) એ જણાવ્યું કે તમામ મુસાફરો સુરક્ષિત છે અને કોઈ જાનહાનિ થઈ નથી. મુસાફરોને અન્ય કોચોમાં ખસેડીને તેમની આગળની યાત્રાની વ્યવસ્થા કરવામાં આવી રહી છે.

સત્તાવાળાઓએ જણાવ્યું કે આગ લાગવાનું ચોક્કસ કારણ હજુ સુધી જાણી શકાયું નથી અને તેની તપાસ ચાલુ છે. રેલવે વિભાગે તાત્કાલિક સંપર્ક માટે હેલ્પલાઇન નંબર પણ જાહેર કર્યા છે.

આ ઘટના થોડા દિવસ પહેલાં હૈદરાબાદ–જયપુર સ્પેશિયલ એક્સપ્રેસમાં લાગેલી આગની ઘટનાની યાદ અપાવે છે, જેમાં પણ એસી કોચમાં આગ લાગી હતી.