ઉનાળાની ઋતુમાં લોકો એવી વાનગીઓ અને મીઠાઈઓ શોધતા હોય છે જે સ્વાદિષ્ટ હોવા ઉપરાંત સ્વાસ્થ્ય માટે પણ ફાયદાકારક હોય. આવી જ એક મીઠાઈ છે ‘દૂધી કલાકંદ’, જે આજે હેલ્થ કોન્શિયસ લોકો વચ્ચે લોકપ્રિય બની રહી છે. દૂધીમાંથી બનતી આ મીઠાઈ માત્ર સ્વાદથી ભરપૂર જ નહીં, પરંતુ અનેક પોષક તત્વોનો ખજાનો પણ માનવામાં આવે છે.

સામાન્ય રીતે દૂધીનો ઉપયોગ શાકભાજી તરીકે થાય છે, પરંતુ તેમાંથી તૈયાર થતો કલાકંદ મીઠાઈપ્રેમીઓ માટે એક અનોખો અને પૌષ્ટિક વિકલ્પ બની શકે છે. દૂધીમાં પાણીનું પ્રમાણ વધુ હોવાથી તે શરીરને હાઇડ્રેટ રાખવામાં મદદ કરે છે. ઉપરાંત તેમાં ફાઇબર, પોટેશિયમ, કેલ્શિયમ, વિટામિન A અને એન્ટીઓક્સિડન્ટ્સ જેવા મહત્વપૂર્ણ પોષક તત્વો મળી આવે છે.

નિષ્ણાતોના જણાવ્યા અનુસાર દૂધી કલાકંદ પાચનતંત્ર માટે લાભદાયી છે. તેમાં રહેલું ફાઇબર કબજિયાત, ગેસ અને એસિડિટી જેવી સમસ્યાઓમાં રાહત આપે છે. ઓછી કેલરી ધરાવતી આ મીઠાઈ વજન નિયંત્રણમાં પણ મદદરૂપ બની શકે છે. પોટેશિયમ બ્લડ પ્રેશરને સંતુલિત રાખવામાં સહાયક છે અને હૃદયના સ્વાસ્થ્ય માટે પણ ફાયદાકારક માનવામાં આવે છે. ઉપરાંત તે શરીરમાંથી ઝેરી તત્વો દૂર કરવામાં અને ત્વચાની ચમક જાળવવામાં મદદ કરે છે.

દૂધી કલાકંદ બનાવવાની રીત પણ સરળ છે. તાજી દૂધીને છોલીને ખમણી લેવી, ત્યારબાદ ઘીમાં શેકી તેમાં ખાંડ ઉમેરી પાણી સુકાઈ જાય ત્યાં સુધી રાંધવું. પછી તેમાં માવો અથવા મિલ્ક પાઉડર ઉમેરી ગાઢ મિશ્રણ તૈયાર કરવું. અંતે એલચી પાવડર ઉમેરી ટ્રેમાં પાથરી ઠંડું થવા દેવું. તૈયાર થયેલા કલાકંદને બાદામ, પિસ્તા અથવા કોપરાથી સજાવી પીરસી શકાય છે.

સ્વાદ અને સ્વાસ્થ્યનો સુંદર સમન્વય ધરાવતી દૂધી કલાકંદ ઉનાળામાં એક ઉત્તમ ડેઝર્ટ વિકલ્પ બની શકે છે.|