ગાંધીનગર: ગુજરાત સરકારે આ વર્ષની બજેટમાં આધુનિક ગ્રીન ટેક્નોલોજી આધારિત હવામાન-પ્રતિકારક રોડોના નિર્માણ માટે ₹1,147 કરોડની ફાળવણી કરી છે. આ યોજના હેઠળ રાજ્યના વિવિધ જિલ્લાઓમાં કુલ 20 રસ્તાઓનું નિર્માણ અને વિકાસ કાર્ય શરૂ કરવામાં આવશે.

આ પ્રોજેક્ટ્સમાં જૂના રોડના મટિરિયલનો પુનઃઉપયોગ કરીને ખર્ચ ઘટાડવા અને પર્યાવરણને અનુકૂળ વિકાસને પ્રોત્સાહન આપવાનો ઉદ્દેશ રાખવામાં આવ્યો છે.

મુખ્ય રોડ પ્રોજેક્ટ્સ

આ યોજનામાં પાટણ, બનાસકાંઠા, ગીર સોમનાથ, મહીસાગર, ભરૂચ, મોરબી, સુરેન્દ્રનગર, સુરત, વડોદરા, છોટા ઉદેપુર, આણંદ, મહેસાણા, કચ્છ, ભાવનગર, જામનગર અને નર્મદા જિલ્લાઓના મહત્વપૂર્ણ માર્ગોનો સમાવેશ થાય છે.

કેટલાક મહત્વપૂર્ણ રોડમાં લણવા–મનુન્ડ–સંદેર–બાલીસાણા રોડ, રાધનપુર–મશાલી–મધાપુરા રોડ, ભીડીયા સોમનાથ રોડ, સાંતરામપુર–જલોડ રોડ, દાયાદરા–નબીપુર–જનોર રોડ, મોરબી–નાની વાવડી–બાઘથલા રોડ સહિત અનેક માર્ગોનો સમાવેશ થાય છે.

ગ્રીન ટેક્નોલોજી હેઠળ કામ કેવી રીતે થાય છે?

આ ટેક્નોલોજીમાં જૂના રોડને ખોદી તેને લાઇમથી ટ્રીટમેન્ટ કરવામાં આવે છે અને મજબૂત બનાવવામાં આવે છે. ત્યારબાદ તેને પલ્વરાઇઝ કરીને રોલિંગ કરવામાં આવે છે અને જૂના મટિરિયલનો ફરી ઉપયોગ કરીને સપાટી તૈયાર કરવામાં આવે છે.

પછી સિમેન્ટ અને કેમિકલ સ્ટેબિલાઇઝેશન કરીને લેવલિંગ કરવામાં આવે છે. અંતે આધુનિક મશીનરી દ્વારા કોમ્પેક્શન કરવામાં આવે છે.

7 દિવસ બાદ સ્ટ્રેસ એબ્સોર્બિંગ મેમ્બ્રેન ઇન્ટરલેયર (SAMI) નામની હાઈ-ટેક ફાઇબર શીટ પાથરીને પછી આસ્ફાલ્ટ લગાવવામાં આવે છે, જે તિરાડો અટકાવે છે અને રોડની આયુષ્ય વધારે છે.

ગ્રીન ટેક્નોલોજીના ફાયદા

આ ટેક્નોલોજીથી જૂના રોડ મટિરિયલ, માટી અને ધાતુનો પુનઃઉપયોગ થાય છે, જે ખર્ચ ઘટાડે છે અને રોડની મજબૂતી વધારે છે. સાથે જ લાંબા ગાળે રોડની ટકાઉપણું વધે છે અને વારંવાર રિપેરની જરૂર ઘટે છે.

આ ઉપરાંત કાર્બન ઉત્સર્જન ઘટાડવામાં અને કુદરતી સંસાધનો બચાવવામાં પણ મદદ મળે છે.

ઉપયોગમાં લેવાતી મહત્વપૂર્ણ ટેક્નોલોજી
વેસ્ટ પ્લાસ્ટિક રોડ ટેક્નોલોજી
વ્હાઇટ ટોપિંગ (Concrete Overlay)
જીઓગ્રિડ અને ગ્લાસ ગ્રિડ ટેક્નોલોજી
કોલ્ડ મિક્સ આસ્ફાલ્ટ
સિમેન્ટ સ્ટેબિલાઇઝેશન
ફ્લાય ઍશ ટેક્નોલોજી
ઇન્ટરલોકિંગ પેવર્સ
પેનલ્ડ કૉન્ક્રીટ રોડ
પર્પેચ્યુઅલ પેવમેન્ટ (લાંબા સમય સુધી ટકાઉ રસ્તા)

આ પ્રોજેક્ટ રાજ્યમાં ટકાઉ વિકાસ અને આધુનિક ઇન્ફ્રાસ્ટ્રક્ચર તરફ મહત્વપૂર્ણ પગલું માનવામાં આવી રહ્યું છે