Donald Trump: અમેરિકાના રાષ્ટ્રપતિ ડોનાલ્ડ ટ્રમ્પનો આગામી સપ્તાહે થનારો ઇઝરાયલ પ્રવાસ રદ કરવામાં આવ્યો છે. ટ્રમ્પ ઇઝરાયલના 78મા સ્વતંત્રતા દિવસના સમારોહમાં હાજરી આપવા માટે ત્યાં જવાના હતા. અહેવાલો અનુસાર, ઇરાન સાથે ચાલી રહેલા યુદ્ધવિરામના કાર્યક્રમને કારણે તેમની મુલાકાત મુલતવી રાખવામાં આવી છે. 

ઇઝરાયલી મીડિયા અહેવાલો અનુસાર, ટ્રમ્પ ન તો સમારોહમાં હાજરી આપશે અને ન તો વીડિયો સંદેશ દ્વારા "ઇઝરાયલ પ્રાઇઝ" કાર્યક્રમમાં ભાગ લેશે. જો કે, વ્હાઇટ હાઉસે હજુ સુધી સત્તાવાર રીતે પુષ્ટિ કરી નથી, પરંતુ ઇઝરાયલમાં તે લગભગ નિશ્ચિત છે કે તેમની મુલાકાત શક્ય નથી.

ઇઝરાયલના વડાપ્રધાન બેન્જામિન નેતન્યાહૂએ અગાઉ જાહેરાત કરી હતી કે, પરંપરા તોડીને ટ્રમ્પને ઇઝરાયલ પુરસ્કાર એનાયત કરવામાં આવશે. આ દેશનો સર્વોચ્ચ સાંસ્કૃતિક સન્માન છે, જે ક્યારેય કોઈ બિન-ઇઝરાયલીને આપવામાં આવ્યો નથી. ટ્રમ્પ હવે ઇઝરાયલની તેમની આગામી મુલાકાત દરમિયાન એક અલગ સમારોહમાં આ પુરસ્કાર પ્રાપ્ત કરશે. 

સ્વતંત્રતા દિવસની ઉજવણી દરમિયાન તેમના સન્માનનો ઉલ્લેખ ફક્ત વીડિયો દ્વારા કરવામાં આવશે. અહેવાલો એ પણ સૂચવે છે કે, આ કાર્યક્રમમાં પોપ ગાયિકા નોઆ કિરેલનું પ્રદર્શન મુલતવી રાખવામાં આવ્યું છે, કારણ કે તે ટ્રમ્પના સન્માનમાં પરફોર્મ કરવાની હતી.

આ દરમિયાન આર્જેન્ટિનાના રાષ્ટ્રપતિ જાવિઅર મિલેની સમારોહમાં હાજરી આપશે. તેમની મુલાકાત પહેલાથી જ નક્કી હતી અને તેઓ 18 એપ્રિલે ઇઝરાયલ પહોંચશે. એકંદરે, મધ્ય પૂર્વમાં ચાલી રહેલા તણાવ અને ઈરાન સાથે યુદ્ધવિરામની સ્થિતિએ ટ્રમ્પની મહત્વપૂર્ણ મુલાકાતને અસર કરી છે.