અફઘાનિસ્તાન સામેની આવનારી વનડે સિરીઝ પહેલાં ભારતીય ટીમના અનુભવી ઓપનર રોહિત શર્માની ફિટનેસ પર સૌની નજર છે. ટીમમાં તેમની પસંદગી ફિટનેસના આધારે કરવામાં આવી હોવાનું કહેવાય છે. જો રોહિત શર્મા ફિટનેસ ટેસ્ટમાં સફળ નહીં થાય અને સિરીઝમાંથી બહાર રહે તો ભારતીય ટીમ પાસે તેમના વિકલ્પ તરીકે કેટલાક પ્રતિભાશાળી ખેલાડીઓ ઉપલબ્ધ છે.

આ ત્રણ ખેલાડીઓ રોહિત શર્માની ગેરહાજરીમાં ટીમ માટે મહત્વની ભૂમિકા ભજવી શકે છે.

1.યશસ્વી જયસવાલ(Yashasvi Jaiswal)  

યુવા ઓપનર યશસ્વી જયસવાલ રોહિત શર્માના સૌથી મજબૂત વિકલ્પ તરીકે જોવામાં આવી રહ્યા છે. તેઓ પણ ઇનિંગ્સની શરૂઆત કરે છે અને ડાબોડી બેટ્સમેન હોવાના કારણે ટીમને જમણા-ડાબા હાથના બેટ્સમેનનું સારું સંયોજન મળી શકે છે.

યશસ્વીએ અત્યાર સુધી ભારત માટે ચાર વનડે મેચ રમી છે, જેમાં 57ની સરેરાશથી 171 રન બનાવ્યા છે. તેમના ખાતામાં એક સદી પણ નોંધાઈ છે. તેઓ ત્રણેય ફોર્મેટમાં રમવાનો અનુભવ ધરાવે છે.

2.સાઈ સુદર્શન 

તાજેતરમાં સમાપ્ત થયેલી ઇંડિયન પ્રીમિયર લીગમાં શાનદાર પ્રદર્શન કરનાર સાઈ સુદર્શન પણ રોહિતના વિકલ્પ તરીકે ચર્ચામાં છે. IPLમાં તેઓ સૌથી વધુ રન બનાવનાર ખેલાડીઓમાં સામેલ રહ્યા હતા.

સુદર્શને ભારત માટે ત્રણ વનડે મેચ રમી છે, જેમાં 63.50ની સરેરાશથી 127 રન બનાવ્યા છે. તેમની બે અડધી સદી પણ નોંધાઈ છે. હાલની ફોર્મને જોતા તેઓ ટીમ માટે મહત્વપૂર્ણ સાબિત થઈ શકે છે.
|
3. સંજુ સેમસન 

સંજુ સેમસન પણ રોહિત શર્માની જગ્યાએ તક મેળવવાના દાવેદારોમાં સામેલ છે. તેઓ હાલમાં ઉત્તમ ફોર્મમાં છે અને મર્યાદિત ઓવરના ક્રિકેટમાં સતત સારું પ્રદર્શન કરી રહ્યા છે.

સેમસને ભારત માટે અત્યાર સુધી 16 વનડે મેચ રમી છે અને 56.66ની સરેરાશથી 510 રન બનાવ્યા છે. તેમના નામે એક સદી અને ત્રણ અડધી સદી નોંધાયેલી છે. અનુભવ અને ફોર્મ બંનેને ધ્યાનમાં રાખતા તેઓ મજબૂત વિકલ્પ માનવામાં આવે છે.

કોણ બની શકે રોહિતનો સાચો વિકલ્પ?

જો રોહિત શર્મા અફઘાનિસ્તાન સામેની વનડે સિરીઝમાં ઉપલબ્ધ નહીં હોય તો યશસ્વી જયસવાલ, સાઈ સુદર્શન અને સંજુ સેમસન ત્રણેય ખેલાડીઓ ટીમ મેનેજમેન્ટ માટે મહત્વના વિકલ્પ બની શકે છે. હવે પસંદગી ટીમની રણનીતિ, પિચની પરિસ્થિતિ અને ખેલાડીઓની ફિટનેસ પર નિર્ભર રહેશે.