Raghav Chaddha: રાજ્યસભાના સાંસદ રાધવ ચઢ્ઢાએ આમ આદમી પાર્ટીમાંથી રાજીનામું આપી દીધું છે. તેમણે શુક્રવારે એક પ્રેસ કોન્ફરન્સમાં ભાજપમાં વિલયની જાહેરાત કરી હતી. ચઢ્ઢાએ ભાજપમાં જોડાનારા પોતાના નામ સહિત સાત અન્ય નામોની યાદી આપી હતી. રસપ્રદ વાત એ છે કે, 15 દિવસ પહેલા ચઢ્ઢાના સ્થાને રાજ્યસભાના ઉપનેતા તરીકે નિયુક્ત થયેલા અશોક મિત્તલ પણ ભાજપમાં જોડાઈ રહ્યા છે.

"હું આમ આદમી પાર્ટીથી અલગ થઈ રહ્યો છું." ભારે હૃદય સાથે બોલતા રાઘવ ચઢ્ઢાએ એક પ્રેસ કોન્ફરન્સમાં જણાવ્યું હતું કે, આમ આદમી પાર્ટી જે આદર્શો અને મૂળ મૂલ્યો માટે સ્થાપિત થઈ હતી તેનાથી સંપૂર્ણપણે ભટકી ગઈ છે. તેમણે એમ કહીને સ્થિતિ સ્પષ્ટ કરી કે, "હું આમ આદમી પાર્ટીથી અલગ થઈ રહ્યો છું અને લોકો તરફ આગળ વધી રહ્યો છું."

બે તૃતીયાંશથી વધુ સાંસદો ભાજપમાં જોડાશે - રાઘવ ચઢ્ઢા
આ દરમિયાન તેમણે 7 સાંસદોના નામ આપ્યા હતા, જે હવે ભારતીય જનતા પાર્ટીમાં જોડાવા જઈ રહ્યા છે. રાઘવ ચઢ્ઢાએ કહ્યું કે, તેમણે આ વિલીનીકરણ, રાજીનામા વગેરે માટે કાગળકામ પૂર્ણ કરી લીધું છે. મોટો દાવો કરતા આમ આદમી પાર્ટીના રાજ્યસભા સાંસદ રાઘવ ચઢ્ઢાએ કહ્યું કે, રાજ્યસભામાં પાર્ટીના બે તૃતીયાંશથી વધુ સાંસદોએ ભાજપમાં ભળી જવાનો નિર્ણય લીધો છે. તેમણે કહ્યું કે, AAP પાસે કુલ 10 રાજ્યસભા સાંસદો છે અને તેમાંથી 2/3થી વધુ આ નિર્ણય સાથે છે.

રાઘવ ચઢ્ઢાના જણાવ્યા મુજબ, બધા સાંસદોએ આ સંદર્ભમાં દસ્તાવેજો પર હસ્તાક્ષર કર્યા છે અને રાજ્યસભાના અધ્યક્ષને સુપરત કર્યા છે. તેમણે કહ્યું કે, તેમની સાથે ત્રણ સાંસદો હાજર છે. જ્યારે અન્યમાં હરભજન સિંહ, રાજિન્દર ગુપ્તા, વિક્રમ સાહની અને સ્વાતિ માલીવાલનો સમાવેશ થાય છે .

1. સ્વાતિ માલીવાલ: જાન્યુઆરી 2024માં ચૂંટાયા.
2. અશોક કુમાર મિત્તલ: પંજાબ.
3. સંદીપ પાઠક: પંજાબ.
4. હરભજન સિંહઃ પંજાબ.
5. બલબીર સિંહ સીચેવાલઃ પંજાબ.
6. વિક્રમજીત સિંહ સાહનીઃ પંજાબ.

રાઘવ ચઢ્ઢાએ કહ્યું, "છેલ્લા કેટલાક વર્ષોથી મને એવું લાગી રહ્યું છે કે હું ખોટા પક્ષમાં સાચો વ્યક્તિ છું. અમે બંધારણની જોગવાઈઓનો ઉપયોગ કરીને ભાજપમાં ભળી જવાનો નિર્ણય લીધો છે." તેમણે ઉમેર્યું, "આપ, જેને મેં મારા લોહી અને પરસેવાથી ઉછેર્યું હતું અને મારી યુવાનીનાં 15 વર્ષ સમર્પિત કર્યા હતા, તે હવે તેના સિદ્ધાંતો, મૂલ્યો અને મુખ્ય નૈતિકતાથી ભટકી ગઈ છે. આ પક્ષ હવે રાષ્ટ્રના હિત માટે નહીં, પરંતુ પોતાના વ્યક્તિગત લાભ માટે કામ કરે છે."