ગર્ભાવસ્થા દરમિયાન ચહેરા પર કેમ આવે છે કુદરતી ગ્લો? જાણો શરીરમાં થતા મહત્વના ફેરફારો

ગર્ભાવસ્થાના નવ મહિનામાં મહિલાના શરીરમાં અનેક કુદરતી અને હોર્મોનલ ફેરફારો થાય છે, જેની અસર માત્ર સ્વાસ્થ્ય પર જ નહીં પરંતુ ચહેરા અને ત્વચા પર પણ સ્પષ્ટ જોવા મળે છે. ઘણા લોકો ગર્ભાવસ્થા દરમિયાન મહિલાના ચહેરા પર આવતી વિશેષ ચમકને "પ્રેગ્નન્સી ગ્લો" તરીકે ઓળખે છે. જોકે, દરેક મહિલામાં આ અનુભવ એકસરખો હોય તે જરૂરી નથી.

તબીબોના જણાવ્યા અનુસાર,  ગર્ભાવસ્થા દરમિયાન શરીરમાં હોર્મોનનું પ્રમાણ વધે છે, જેના કારણે ત્વચામાં રક્તપ્રવાહ વધુ સારો બને છે. પરિણામે ચહેરો વધુ તાજગીભર્યો, સ્વચ્છ અને તેજસ્વી દેખાવા લાગે છે. ખાસ કરીને ચોથા મહિના પછી આ ગ્લો વધુ સ્પષ્ટ જોવા મળે છે.

આ સમયગાળા દરમિયાન માતા અને ગર્ભમાં રહેલા બાળકની જરૂરિયાતોને પહોંચી વળવા શરીરમાં લોહીનું પ્રમાણ પણ નોંધપાત્ર રીતે વધી જાય છે. વધેલા રક્તપ્રવાહના કારણે ચહેરાની નસોમાં વધુ લોહી પહોંચે છે, જેના કારણે ગાલ પર હળવી લાલાશ અને કુદરતી ચમક જોવા મળે છે.

ગર્ભાવસ્થા દરમિયાન ત્વચામાં કુદરતી તેલનું ઉત્પાદન પણ વધી શકે છે. જેના કારણે ત્વચા નરમ અને ચમકદાર દેખાય છે. જોકે, જેમની ત્વચા પહેલેથી જ તૈલીય હોય તેમને આ દરમિયાન ખીલ અથવા પિમ્પલ્સની સમસ્યા પણ થઈ શકે છે, જે સામાન્ય માનવામાં આવે છે.

તબીબો ગર્ભવતી મહિલાઓને સંતુલિત આહાર, પૂરતું પાણી, તાજા ફળો, લીલા શાકભાજી, દૂધ, દહીં અને પ્રોટીનયુક્ત આહાર લેવાની સલાહ આપે છે. યોગ્ય પોષણ અને શરીરની સારી સંભાળથી માતા અને બાળક બંનેના સ્વાસ્થ્ય સાથે ત્વચા પણ વધુ સ્વસ્થ અને તેજસ્વી રહે છે.