Surat : નવી સિવિલ હોસ્પિટલની સુરક્ષા હવે બની હાઈટેક, 15 અત્યાધુનિક વોકી-ટોકી ફાળવાઈ
સુરતની નવી સિવિલ હોસ્પિટલમાં સુરક્ષા વ્યવસ્થાને વધુ મજબૂત અને ઝડપી બનાવવા માટે મહત્વપૂર્ણ પગલું લેવામાં આવ્યું છે. હોસ્પિટલના સુરક્ષાકર્મીઓને મોટોરોલા કંપનીની 15 અત્યાધુનિક વોકી-ટોકી ફાળવવામાં આવી છે. આ સિસ્ટમના કારણે હોસ્પિટલ કેમ્પસમાં મોબાઈલ નેટવર્કની સમસ્યા વચ્ચે પણ સુરક્ષાકર્મીઓ વચ્ચે 24 કલાક અવિરત સંચાર જાળવી શકાશે.
મળતી માહિતી મુજબ, આ વોકી-ટોકી સિસ્ટમની રેન્જ આશરે 5 કિલોમીટર છે. જેના કારણે હોસ્પિટલના બેઝમેન્ટથી લઈને ટેરેસ તેમજ મજુરા ગેટ સુધી સુરક્ષાકર્મીઓ એકબીજા સાથે સરળતાથી સંપર્કમાં રહી શકશે.
હોસ્પિટલના ઈમરજન્સી વોર્ડ, ઓપરેશન થિયેટર (OT), મેઈન ગેટ અને સ્ટેમ સેલ જેવા સંવેદનશીલ સ્થળો પર વોકી-ટોકી તૈનાત કરવામાં આવી છે. ખાસ કરીને ઈમરજન્સીની સ્થિતિમાં ગણતરીની સેકન્ડોમાં જરૂરી સંદેશો સંબંધિત સુરક્ષાકર્મીઓ સુધી પહોંચાડી શકાશે.
દર્દીઓના સગાઓ વચ્ચે કોઈ પ્રકારનું ઘર્ષણ થાય અથવા હોસ્પિટલમાં અચાનક કોઈ ગંભીર પરિસ્થિતિ ઊભી થાય ત્યારે પણ આ સંચાર વ્યવસ્થા સુરક્ષાકર્મીઓને ઝડપી પ્રતિસાદ આપવામાં મદદરૂપ બનશે.
તબીબી અધિક્ષક અને RMOના માર્ગદર્શન હેઠળ આ નવી વ્યવસ્થા અમલમાં મૂકવામાં આવી છે. હોસ્પિટલ તંત્ર દ્વારા આગામી સમયમાં વધુ 10 વોકી-ટોકી સેટ ઉમેરવાની પણ તૈયારી કરવામાં આવી છે. આથી નવી સિવિલ હોસ્પિટલની સુરક્ષા અને આંતરિક સંચાર વ્યવસ્થા વધુ સુવ્યવસ્થિત બનશે.
