ASUS પર મોટો સાયબર એટેકઃ eShopના ગ્રાહકોની નામ-નંબરથી ઓર્ડર ડિટેલ સુધીની માહિતી જોખમમાં

ASUS eShop Data Breach: લેપટોપ અને ટેક ગેજેટ્સ બનાવતી દિગ્ગજ કંપની ASUSના eShop પર અનધિકૃત ઍક્સેસની ઘટના સામે આવી છે. કંપનીએ પોતાના કેટલાક eShop ગ્રાહકોને ઈમેલ કરીને આ અંગે ચેતવણી આપી છે. ASUSના જણાવ્યા મુજબ, કંપનીના ઓનલાઈન સ્ટોરના એક ભાગમાં અનધિકૃત ઍક્સેસ મળી હતી અને કેટલીક ગ્રાહક માહિતી ઍક્સેસ થઈ હોવાની શક્યતા છે.

કઈ માહિતી જોખમમાં આવી?

ASUSના જણાવ્યા મુજબ, પ્રાથમિક તપાસમાં ગ્રાહકોની સંપર્ક વિગતો અને ઓર્ડર રેકોર્ડ્સ ઍક્સેસ થયા હોવાની શક્યતા સામે આવી છે. જોકે કંપનીએ હજુ સુધી કેટલા ગ્રાહકો આ ઘટનાથી અસરગ્રસ્ત થયા છે અથવા કયા દેશોના ગ્રાહકો અસરગ્રસ્ત છે તેની ચોક્કસ માહિતી જાહેર કરી નથી. ASUSનું eShop ઓનલાઈન ખરીદી માટેનું પ્લેટફોર્મ છે, જ્યાં ગ્રાહકો લેપટોપ, કમ્પ્યુટર, એસેસરીઝ અને અન્ય પ્રોડક્ટ્સ ખરીદી શકે છે. કંપનીની પ્રાઈવસી પોલિસી મુજબ ઓનલાઈન ઓર્ડર માટે નામ, સંપર્ક માહિતી, સરનામું અને ઓર્ડર સંબંધિત વિગતો જેવી માહિતી એકત્ર કરવામાં આવે છે.

બેંક એકાઉન્ટ અને પેમેન્ટ કાર્ડ સુરક્ષિત હોવાનો કંપનીનો દાવો

આ ઘટનામાં રાહતની વાત એ છે કે ASUSના જણાવ્યા મુજબ પેમેન્ટ કાર્ડ, બેંક એકાઉન્ટ અને અન્ય નાણાકીય માહિતી આ ડેટા બ્રીચમાં સામેલ નહોતી. કંપનીએ એમ પણ જણાવ્યું છે કે હાલમાં ચોરાયેલી અથવા ઍક્સેસ થયેલી માહિતીનો દુરુપયોગ થયો હોવાની કોઈ જાણકારી નથી. કંપનીએ અનધિકૃત ઍક્સેસને નિયંત્રિત કરવા પગલાં લીધા છે અને અસરગ્રસ્ત સિસ્ટમની સુરક્ષા વધુ મજબૂત કરી છે. ASUSના જણાવ્યા મુજબ હાલમાં સતત અનધિકૃત ઍક્સેસ ચાલુ હોવાના કોઈ પુરાવા મળ્યા નથી, જ્યારે તપાસ હજુ ચાલી રહી છે.

ગ્રાહકો સાથે થઈ શકે છે ફિશિંગ અને ફ્રોડ

ડેટા લીકમાં જો ગ્રાહકોની સંપર્ક અને ઓર્ડર સંબંધિત માહિતીનો ઉપયોગ કરવામાં આવે તો સાયબર ઠગો વધુ વિશ્વસનીય દેખાતા ફિશિંગ ઈમેલ, SMS અથવા ફોન કોલ કરી શકે છે. ઉદાહરણ તરીકે, ઠગો ગ્રાહકે અગાઉ કરેલા ASUS ઓર્ડરની વિગતોનો ઉલ્લેખ કરીને નકલી લિંક પર ક્લિક કરાવવા અથવા વ્યક્તિગત માહિતી મેળવવાનો પ્રયાસ કરી શકે છે. આથી ASUS ગ્રાહકોને પોતાના અગાઉના ઓર્ડરનો ઉલ્લેખ કરતા કોઈ અનપેક્ષિત મેસેજ, ઈમેલ અથવા ફોન કોલ આવે તો સાવચેત રહેવાની જરૂર છે. ASUS India પણ નકલી અને અનધિકૃત વેબસાઈટ, ઈમેલ અને કમ્યુનિકેશન ચેનલથી સાવચેત રહેવાની સલાહ આપે છે.

કેટલા ગ્રાહકો અસરગ્રસ્ત થયા? હજુ સ્પષ્ટ નથી

હાલમાં ASUSએ આ ઘટનાથી અસરગ્રસ્ત ગ્રાહકોની ચોક્કસ સંખ્યા જાહેર કરી નથી. તેમજ અનધિકૃત ઍક્સેસ ક્યારે શરૂ થઈ, કેટલા સમય સુધી રહી અને હુમલાખોરોએ સિસ્ટમમાં કેવી રીતે પ્રવેશ મેળવ્યો તે અંગે પણ સંપૂર્ણ વિગતો જાહેર થઈ નથી. કંપનીની તપાસ ચાલુ છે.