Mohan Bhagwat: પંચ પરિવર્તન પર આપ્યો ભાર, કહ્યું- વિવેકના અભાવે નવી પેઢી નશાની લતનો બની રહી છે શિકાર

Mohan Bhagwat: રાષ્ટ્રીય સ્વયંસેવક સંઘ (RSS)ના સરસંઘચાલક ડૉ. મોહન ભાગવત નાગપુરમાં સંઘના શતાબ્દી વર્ષના શ્રી વિજયાદશમી ઉત્સવમાં ઉપસ્થિત રહ્યા હતા. સ્વયંસેવકોના પથસંચલન સાથે ઉત્સવની શરૂઆત થઈ હતી. આ પ્રસંગે સંબોધન કરતાં ભાગવતે સ્વબોધ, પંચ પરિવર્તન, નવી પેઢીમાં વધતી નશાની લત અને સંતુલિત વિકાસ સહિતના મુદ્દાઓ પર ભાર મૂક્યો હતો.

પંચ પરિવર્તનને જીવનશૈલી બનાવવાની અપીલ

મોહન ભાગવતે કહ્યું કે પંચ પરિવર્તનની પાંચ પહેલ—સામાજિક સમરસતા, કુટુંબ પ્રબોધન, પર્યાવરણ સંરક્ષણ, સ્વબોધ અને સ્વદેશી તથા નાગરિક અનુશાસન—ને સમાજના વિવિધ વર્ગોમાં આવકાર મળ્યો છે. તેમના મતે, આ માત્ર એક વર્ષ પૂરતો ચાલતો કાર્યક્રમ નથી, પરંતુ જીવનમાં સકારાત્મક પરિવર્તન લાવતી આચરણશૈલી છે.

તેમણે સ્વબોધના મહત્ત્વ પર ભાર મૂકતાં કહ્યું કે સમાજે પોતાની વિસ્મૃતિ દૂર કરીને દેશના મૂળ તત્ત્વોને સમજવા, સ્વીકારવા અને જીવનનાં તમામ ક્ષેત્રોમાં ગુણવત્તાસભર જીવનનું નિર્માણ કરવા પ્રયત્ન કરવો જોઈએ.

OTT અને નવી પેઢીના વિવેક અંગે ચિંતા

નવી પેઢી વિવિધ માધ્યમોમાંથી મળતી માહિતી યોગ્ય-અયોગ્યનો વિચાર કર્યા વિના સ્વીકારી રહી હોવાની ચિંતા ભાગવતે વ્યક્ત કરી હતી. તેમણે કહ્યું કે તેના પરિણામોને ધ્યાનમાં રાખીને કેટલાક દેશોએ અનુશાસન અને પ્રતિબંધો લાગુ કર્યા છે. ભારતમાં પણ ખાસ કરીને OTT પ્લેટફોર્મ અંગે આવી જરૂરિયાત અનુભવાઈ રહી છે. આ મુદ્દે શાસન અને વહીવટી તંત્રએ વિચાર કરવો જોઈએ.

નશાની લત ગંભીર રાષ્ટ્રીય સમસ્યા

ભાગવતે જણાવ્યું કે વિવેકના અભાવે વિશ્વભરમાં નવી પેઢી નશીલા પદાર્થોની લતનો ભોગ બની રહી છે. તેમણે નશાને ગંભીર રાષ્ટ્રીય સમસ્યા ગણાવી હતી અને તેના નિવારણ માટે સરકાર, વહીવટી તંત્ર તથા સમાજે સમયસર પ્રયાસો શરૂ કરવાની જરૂરિયાત પર ભાર મૂક્યો હતો. વર્તમાન અભિભાવક પેઢીએ યુવાનોમાં યોગ્ય-અયોગ્યનો વિવેક વિકસાવવો જોઈએ, તેમ તેમણે કહ્યું.

વિકાસમાં પ્રકૃતિ અને સંતુલનનું મહત્ત્વ

વિજ્ઞાન અને ટેક્નોલોજી માનવજીવનને સુવિધાજનક બનાવે છે, પરંતુ ટેક્નોલોજી માત્ર એક સાધન છે, એવું ભાગવતે જણાવ્યું હતું. માત્ર ભૌતિક સુખ-સુવિધા અને ઉપભોગને કેન્દ્રમાં રાખીને થતો વિકાસ નુકસાનકારક બની શકે છે.

નેપાળની ભયાનક દુર્ઘટનાનો ઉલ્લેખ કરતાં તેમણે હિમાલય વિસ્તારમાં થયેલા એકાંગી વિકાસ અંગે ચિંતા વ્યક્ત કરી હતી. ભારત, તિબેટ, ભૂટાન અને ચીન સુધી વિસ્તરેલા હિમાલય ક્ષેત્રમાં વિકાસ માટે સમતોલ અને સર્વાંગી દૃષ્ટિકોણ અપનાવવાની જરૂરિયાત તેમણે દર્શાવી હતી.

ભાગવતના સંબોધનનો મુખ્ય સંદેશ એ રહ્યો કે સમાજમાં સ્વબોધ, નૈતિક વિવેક, સામાજિક જવાબદારી અને પર્યાવરણને ધ્યાનમાં રાખતો સંતુલિત વિકાસ જરૂરી છે.

આ પણ વાંચો : Rupal Palli Yatraમાં શ્રદ્ધાનો મહાસાગર, રસ્તાઓ પર ઘીની નદીઓ વહેતી હોય તેવાં અદભુત દૃશ્યો