Andhra Pradeshના દરિયાકાંઠે વાવાઝોડાનું જોખમ, 28 ઑક્ટોબરે ત્રાટકવાની શક્યતા

Andhra Pradesh: બંગાળની ખાડીમાં સર્જાયેલું ડિપ્રેશન વધુ શક્તિશાળી બની ચક્રવાતી વાવાઝોડામાં ફેરવાઈ શકે છે. હવામાન વિભાગના અહેવાલ મુજબ, આ સિસ્ટમ 28 ઑક્ટોબરની આસપાસ આંધ્રપ્રદેશના દરિયાકાંઠે બાપટલા અને વિશાખાપટ્ટનમ વચ્ચે ત્રાટકવાની શક્યતા છે. સંભવિત જોખમને ધ્યાનમાં રાખીને આંધ્રપ્રદેશના મુખ્યમંત્રી એન. ચંદ્રબાબુ નાયડુએ વહીવટી તંત્રને હાઈ એલર્ટ પર રહેવા અને લોકોને અગાઉથી સાવચેતીની સૂચનાઓ આપવા નિર્દેશ આપ્યો છે.

ધીમે ધીમે શક્તિશાળી બનવાની આગાહી

હવામાન વિભાગના બુલેટિન અનુસાર, પૂર્વ-મધ્ય અને દક્ષિણ-પૂર્વ બંગાળની ખાડીમાં બનેલું ડિપ્રેશન શરૂઆતમાં ઉત્તર-ઉત્તરપશ્ચિમ તરફ આગળ વધ્યું હતું. ત્યારબાદ તે વધુ શક્તિશાળી બની ડીપ ડિપ્રેશન અને પછી ચક્રવાતી વાવાઝોડામાં ફેરવાઈ શકે છે.

આગાહી મુજબ, 26 ઑક્ટોબરની સવાર સુધીમાં તે ચક્રવાતી વાવાઝોડું અને 27 ઑક્ટોબરની આસપાસ ગંભીર ચક્રવાતી વાવાઝોડું બની શકે છે. ત્યારબાદ તેની તીવ્રતા વધીને અત્યંત ગંભીર ચક્રવાતી વાવાઝોડામાં ફેરવાવાની શક્યતા વ્યક્ત કરવામાં આવી છે.

140 કિમી પ્રતિ કલાક સુધી પવન ફૂંકાવાની શક્યતા

હવામાન વિભાગના જણાવ્યા મુજબ, વાવાઝોડું આંધ્રપ્રદેશ અને યાનમના દરિયાકાંઠાને અસર કરી શકે છે. આ દરમિયાન પવનની સતત ઝડપ 115થી 125 કિમી પ્રતિ કલાક રહેવાની અને અમુક સમયે 140 કિમી પ્રતિ કલાક સુધી પહોંચવાની શક્યતા છે. દરિયાકાંઠાના વિસ્તારોમાં ભારે પવન અને વરસાદને કારણે જોખમ ઊભું થઈ શકે છે.

આંધ્રપ્રદેશ રાજ્ય આપત્તિ વ્યવસ્થાપન સત્તામંડળે લોકોને અત્યંત સાવચેત રહેવાની સલાહ આપી છે.

CM નાયડુએ તંત્રને આપ્યા આદેશ

મુખ્યમંત્રી ચંદ્રબાબુ નાયડુએ અધિકારીઓ સાથે સમીક્ષા બેઠક યોજીને સંભવિત પરિસ્થિતિનો સામનો કરવા તૈયારીઓની સમીક્ષા કરી હતી. અધિકારીઓએ તેમને જણાવ્યું કે વાવાઝોડાની અસરને કારણે મંગળવાર અને બુધવારે દરિયાકાંઠાના આંધ્રપ્રદેશમાં ભારેથી અતિભારે વરસાદ પડી શકે છે.

મુખ્યમંત્રીએ માછીમારોને દરિયામાં જતાં રોકવા માટે જરૂરી પગલાં લેવા, સંભવિત અસરગ્રસ્ત વિસ્તારોના નીચાણવાળા ભાગોમાં રહેતા લોકોને અગાઉથી ચેતવવા અને કટોકટીના સમયે મદદ મેળવવા માટે ટોલ-ફ્રી નંબર ઉપલબ્ધ કરાવવા સૂચના આપી છે.

નોંધ: વાવાઝોડાની દિશા, તીવ્રતા અને ત્રાટકવાના સ્થળ અંગેની આગાહીમાં ફેરફાર થઈ શકે છે. લોકો તાજી માહિતી અને સત્તાવાર સૂચનાઓ માટે હવામાન વિભાગ તથા સ્થાનિક વહીવટીતંત્રની જાહેરાતોને અનુસરે.

આ પણ વાંચો : CM Yogi Adityanath: દેશને અસ્થિરતા અને અલગતાવાદમાં ધકેલવાનું ષડયંત્ર રચાઈ રહ્યું છે